Túrkistan oblysynda mas halde kólik basqarǵan 40 júrgizýshi ustaldy
TÚRKІSTAN. QazAqparat – Túrkistan oblystyq Polıtsııa departamentiniń qyzmetkerleri jol-kólik apattarynyń aldyn alý men jolda júrý erejelerin óreskel buzýshylardy anyqtaý maqsatynda turaqty túrde reıdtik is-sharalardy ótkizýde. Túngi ýaqytta reıdke shyqqan patrýldik polıtsııa qyzmetkerleri jyl basynan beri mas halde kólik basqarǵan 40 júrgizýshini ustady, dep habarlaıdy QazAqparat tilshisi.
Aıta keteıik, aǵymdaǵy jyldan bastap Prezıdent Qasym-Jomart Toqaev mas halde kólik júrgizgen júrgizýshilerge baılanysty talaptardy qatańdatqan bolatyn. Búginde tártip saqshylary joldaǵy quqyqbuzýshylarǵa qarsy reıdtik sharalardy atqarýda. Óńirdiń polıtseıleri qańtar aıynda ishimdik iship rýlge otyrǵan - 31, al aqpanda 9 adamdy ustaǵan. Zańbuzýshylardyń barlyǵyna QR ÁQBtK-niń 608-baby «Júrgizýshiniń kólik quralyn alkogoldik, esirtkilik jáne (nemese) ýytqumarlyq masań kúıde basqarýy, sol sııaqty kólik quralyn alkogoldik, esirtkilik jáne (nemese) ýytqumarlyq masań kúıdegi adamnyń basqarýyna berý» boıynsha hattamalar toltyrylǵan.
Oblystyq PD baspasóz qyzmetiniń málimetinshe, óńirdiń tártip saqshylaryna jolda júrý erejelerin buzýshylardy anyqtap qana qoımaı, túsindirý jáne profılaktıkalyq jumystardy belsendi júrgizý mindeti qoıylǵan. Sebebi, jol-kólik oqıǵalary kóbine rýlge mas kúıinde otyrý saldarynan oryn alady. Sondaı-aq jıi jol apatyn týdyratyn jaıttar qataryna jyldamdyqty asyrý, manevr jasaý erejesin buzý, kóshe qıylystarynan durys ótpeý, qarsy baǵytqa shyǵý bolyp otyr. Budan ózge jaıaý júrginshiler men jolaýshylardyń da jolda júrý erejesin buzýy da jol-kólik oqıǵasyna ákep soǵýda.
