Túrkistan oblysynda MÁMS júıesine turǵyndardyń 91,6 paıyzy qatysady
TÚRKІSTAN. QazAqparat – Elimizde MÁMS júıesi sheńberinde halyqty medıtsınalyq kómekpen qamtý deńgeıi 95%-dan asady dep boljanýda. Túrkistan oblysy boıynsha bul kórsetkish - 91,6% paıyzdy quramaq, dep habarlaıdy QazAqparat tilshisi.
Óńirdegi medıtsınalyq uıymdar mindetti áleýmettik medıtsınalyq saqtandyrýǵa tolyǵymen daıyn. Aımaqta 2020 jylǵa MÁMS qory 73 ónim berýshimen shart jasasqan bolsa, onyń ishinde memlekettik - 40 (51,3%) jáne jeke - 33 (48,7%) quraǵan. Al, Túrkistan oblysy boıynsha biryńǵaı jıyntyq tólemin tóleýshiler qatary 402 300 adamǵa jetti. Búginde tólemder jasaý úshin óńirde 40 memlekettik medıtsınalyq uıymda termınal qoıylǵan.
Aıta keterligi, biryńǵaı jıyntyq tóleminiń kólemi qala turǵyndary úshin 1 AEK – 2 651 teńge, aýyldyq mekender úshin aıyna 0,5 AEK – 1326 teńge, oǵan barlyq salyqtar men tólemder kiredi. Turǵyndardyń jańa júıege qatysty suraqtary bolsa, 1406 nómirine qońyraý shalyp, onda qajetti aqparattar pen keńester alýǵa bolady.
Eske salaıyq, aǵymdaǵy jyldyń 1 sáýirine deıin eldiń barlyq turǵyndary shartty túrde saqtandyrylǵan bolyp sanalady. Olar TMKKK paketi men MÁMS paketine kiretin medıtsınalyq qyzmetterdi tegin ala alady. Osy kezeńde azamattar ózderiniń saqtandyrý mártebesin anyqtap, mindetti medıtsınalyq saqtandyrý júıesiniń qatysýshy bolýy kerek. Sondyqtan da árbir adam óz statýsyn anyqtap alýy mindetteledi. Eger azamat saqtandyrylmaǵan bolsa, ózin-ózi jumyspen qamtyǵan tulǵalar MÁMS jarnasyn ózine tóleýine bolady. Bank jasap shyǵarǵan tólem termınaldary arqyly júıege jyldam kirýge bolatyn tetikter bar.
