Túrkistan oblysynda mal urlyǵymen aınalysqan birneshe top ustaldy
«Túrkistan oblysy PD krımınaldyq polıtsııa basqarmasynyń tájirıbeli qyzmetkerleri jedel-izdestirý is-sharalarynyń nátıjesinde, jyl basynan beri oblys aýmaǵynda úsh aýdanda iri qara mal urlyǵymen aınalysqan adamdar tobyn ustady», - dedi oblystyq PD bastyǵynyń orynbasary, polıtsııa polkovnıgi Qurmanbek Sahov.
Jedel ýákilderge Báıdibek aýdanynda mal urlyǵymen aınalysatyn belgisiz bireýler týraly aqparat túsken. Tártip saqshylary tergeý áreketterine tez arada kirisip, urlanǵan maldy satyp alýshyny anyqtaıdy.
«Osy arqyly biz, negizgi eki kúdiktini, buryn sottalǵan Báıdibek aýdanynyń turǵyndaryn ustadyq. Mal urylary qoralarǵa jasyryn enip, tórt túlikti jymqyrǵan bolyp shyqty. Sodan keıin maldardy «Gazel» kóligine tıep, Saıram aýdanynyń turǵynyna satqan. Kúdiktilerden zattaı dáleldeme retinde «Gazel» kóligi men 5 bas urlanǵan mal tárkilendi», - dedi spıker.
Sondaı-aq, jaıylymdardan mal urlaýmen aınalysqan taǵy eki top Otyrar jáne Arys aýdandarynda ustalǵan.
«Olardyń biri – Arys aýdanynyń 3 turǵynynan quralǵan, mal urlyǵynyń 12 deregine qatysy bar top. Mundaǵy kúdiktilerden «Gazel» kóligi, tirkelmegen myltyq pen oq-dáriler, sondaı-aq 3 iri qara maldyń terisi tárkilendi. Al, Otyrar aýdanynda ustalǵan adamdar toby 3 adamnan turady. Olardyń mal urlyǵynyń 3 deregine qatystylyǵy dáleldengen. Kúdiktilerden júk kóligi men 1 sıyr tárkilendi. Olar urlanǵan maldy Arys qalasynda jáne Saıram aýdanynda satqan», - dedi Qurmanbek Sahov.
QR QK-niń 188-1-baby «Mal urlyǵy» boıynsha sotqa deıingi tergeý amaldary júrgizilip jatyr. Kúdiktiler qamaýda. Tergeý kúdiktilerdiń Túrkistan oblysy aýmaǵynda jasalǵan basqa da qylmystarǵa qatystylyǵyn anyqtaıdy.
Foto: Túrkistan oblysy PD
