Túrkistan oblysynda mal urlaýmen aınalysqan eki qylmystyq top músheleri qolǵa tústi
TÚRKІSTAN. QazAqparat - Túrkistan oblysynda polıtseıler 6 aýdannan mal urlaǵan eki qylmystyq topty qolǵa túsirdi.
Urylar sońǵy eki jyl aralyǵynda jaıylymnan 20 bas iri qara mal men 58 bas jylqyny qoldy etken, dep habarlaıdy QazAqparat tilshisi.
Oblystyq Polıtsııa departamenti baspasóz qyzmetiniń málimetinshe, 2019-2020 jyldar aralyǵynda Saryaǵash, Tólebı, Saıram, Túlkibas, Báıdibek, Ordabasy aýdandarynyń polıtsııa bólimine 23 jábirlenýshi aryzdanǵan.
Aýyl turǵyndarynyń aıtýynsha, belgisiz bireýler olardyń qora-jaılary men jaıylymnan ondaǵan malyn urlap ketken. Jábirlenýshilerge keltirilgen shyǵynnyń jalpy kólemi 40 mıllıonǵa jýyq teńgeni quraǵan. Osydan keıin polıtseıler shuǵyl izdestirý is-sharalaryna kirisip, Krımınaldy polıtsııa basqarmasy men aýdandyq polıtsııa bólimderiniń tájirıbeli qyzmetkerlerinen jedel-tergeý toby qurylǵan.
Tártip saqshylary jaqyn mańdaǵy barlyq aýmaqtar men jaıylymdardy aralap, kórgen adamdar men aýyl turǵyndarynan málimetter jınaǵan. Mal tasymaldaıtyn avtokólik jáne mal satylatyn oryndardy muqııat tekserip shyqqan. Nátıjesinde jedel ýákilder eki birdeı qylmystyq toptyń izine túsip, olardy qyrkúıek aıynyń basynda Saryaǵash, Tólebı aýdandarymen Shymkent qalasyndaǵy turǵylyqty mekenjaılarynan ustaǵan.
Belgili bolǵandaı, 5 adamnan qurylǵan qylmystyq toptyń biri urlanǵan maldardy júk kóligine artyp, áketip otyrǵan. Al, ekinshi qylmystyq top ózderiniń arnaıy qora-jaılarynda urlanǵan maldy jasyryp ustap otyrǵan.
«Búgingi tańda osy qylmystarǵa qatysy bar degen 8 kúdikti qamaýǵa alyndy. Olar Túrkistan men Shymkent qalasynyń turǵyndary bolyp shyqty. Kúdiktilerdiń beseýi buryn da osyǵan uqsas qylmys jasap, sotty bolǵany anyqtaldy. Sondaı-aq, urlanǵan maldardy satyp alyp otyrǵan 4 tulǵa ustalǵan. Kúdiktilerden 42 bas jylqy tabylyp tárkilenip, olardy polıtseıler zańdy ıelerine qaıtarǵan. Qazirgi ýaqytta atalǵan jaıt boıynsha sotqa deıingi tergeý amaldary júrgizilýde», delingen habarlamada.
