Túrkistan oblysynda mal azyǵy tapshylyǵyn aldyn alý sharalary júrgizilýde

TÚRKІSTAN. QazAqparat - Túrkistan oblysynda qajettilik bolǵan jaǵdaıda mal azyǵyn satyp alý úshin sharýalarǵa tómen paıyzben nesıe beriledi. Bul týraly oblystyq aýyl sharýashylyǵy basqarmasynyń basshysy Nurbek Badyraqov baıandady, dep habarlaıdy QazAqparat tilshisi.

Bıylǵy jyly qýańshylyq batys óńirlerimen qatar, Saryaǵash, Keles aýdandarynyń sharýalary da zardap shekken bolatyn. Endi olarǵa mal azyǵyn satyp alý shyǵyndaryn azaıtý úshin tómen paıyzdy mólsherlememen qarjy uıymdary arqyly nesıe berý tetikteri qarastyryldy. Beriletin nesıeniń sharttary boıynsha jyldyq ústeme qarjysy 6 paıyzdan aspaıdy. Kásipkerlik sertıfıkat talap etilmeıtin boldy. Óńirde osy kúnge deıin 4,2 mln tonna mal azyǵy jınalyp, jospar artyǵymen oryndalǵan.

«Mal azyǵymen qamtamasyz etý – aýdandyq deńgeıde sheshiletin másele. Sondyqtan oǵan tikeleı jaýap beresizder. Barlyq sharýashylyqtardy zerdelep, saraptama jasaý kerek. Eger aýdanda sheshilmeıtin, oblystyq deńgeıdegi másele bolsa, bizge shyǵyńyzdar. Kómekteseıik. Qarjy uıymdarymen kelisip otyrmyz, qajet bolsa, tómen baǵamen nesıe bereıik. Ulttyq park aýmaqtaryna mal jaıýǵa ruqsat alyp berdik. Taǵy da qoldaý kerek bolsa, ol jaǵyn da qarastyramyz. Jergilikti aýmaqtarda aýyl sharýashylyǵy salasyn damytý, baqylaý aýdan, qala ákimderiniń mindeti. Jumysty shıratyńyzdar», - oblys ákimi Ómirzaq Shókeev.

Aımaq basshysy sondaı-aq, tıisti basqarma men aýdan, qala ákimderine mal azyǵy tapshylyǵyn joıý, osy saladaǵy máselelerdi retteý jóninde tapsyrma berdi.