Túrkistan oblysynda maqtanyń 90 paıyzy terildi
TÚRKІSTAN. QazAqparat - Túrkistan oblysynda bıyl 125,8 myń ga alqapqa maqta daqyly egildi. Qazirgi tańda terim naýqanynyń 90 paıyzy oryndalyp, 298,7 myń tonna shıtti maqta jınaldy, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.
Maqtanyń túsimi gektaryna 24,3 tsentnerden. Jalpy jınalǵan aq altynnyń teń jartysynan astamyn 500-ge jýyq kombaın terdi.
Túrkistan oblysy ákiminiń orynbasary Ulan Tájibaev aımaqtaǵy maqta teriminiń barysymen tanysý maqsatynda, Kentaý qalasyndaǵy Qarashyq eldi mekeninde ornalasqan «Turan» sharýa qojalyǵynda boldy. Kooperatıvte tamshylatyp sýarý tehnologııasy qoldanylǵan maqtanyń egis alqabynda maqta jáne maqta talshyǵy ónimderi óndiriledi. Oblys ákiminiń orynbasary issapar barysynda sondaı-aq, otbasylyq fermanyń jaı-kúıimen tanysty.
«Egis kólemine ártaraptandyrý jumysy júrgizilip, ótken jylmen salystyrǵanda shıtti maqta baǵasynyń ulǵaıǵany baıqalady. Nátıjesinde ónimniń tonnasyna ortasha baǵasy 160-165 myń teńgeden qabyldanyp jatyr. Bul óz kezeginde maqta daqylyn ósirýmen aınalysatyn 15 myń agroqurylymda jumyspen qamtylǵan 125 myń adamnyń áleýmettik-ekonomıkalyq jaǵdaıy jaqsartýǵa oń yqpal etýde», - dedi Ulan Tájibaev.
Óńirde maqta ónimdiliginen Ordabasy jáne Maqtaaral aýdandary kósh bastap tur. 18 maqta óńdeý zaýytynyń 166 qabyldaý beketi shıtti maqtany qabyldaýmen aınalysýda.
Maqta sharýashylyǵyn memlekettik qoldaý úshin kóktemgi jáne kúzgi dala jumysyna naryqtaǵy baǵadan arzan 76,2 myń tonna janar-jaǵar maı bosatyldy.
Sonymen qatar, 30 myń agroqurylymǵa mıneraldy tyńaıtqysh pen zııankesterge qarsy qoldanylatyn bıoagenttiń 50 paıyz shyǵyny sýbsıdııalanyp, memlekettik qoldaý kórsetildi.
Budan bólek, quny 6 mlrd teńge 891 aýyl sharýashylyǵy tehnıkasy satyp alynyp, 1,2 mlrd teńge ınvestıtsııalyq sýbsıdııa tólendi.
