Túrkistan oblysynda maqtaǵa ortaq baǵa belgilenedi
TÚRKІSTAN. QazAqparat - Túrkistan oblysynda Jetisaı jáne Maqtaaral aýdandarynyń ákimderi zaýyt basshylarymen kezdesip, maqta baǵasyn naqtylaý men turaqtandyrý jaıyn talqylady. Kezdesýge sondaı-aq, jergilikti depýtattar men oblystyq Aýyl sharýashylyǵy basqarmasynyń mamandary jáne 11 maqta óńdeý zaýytynyń basshylary qatysty, dep habarlaıdy QazAqparat tilshisi.
Basqosýda bıylǵy kúzgi maqta terý naýqanynyń barysy, maqta qabyldaý beketteriniń búgingi jaı-kúıi men aq altyn baǵasy sóz boldy. Jetisaı aýdanynyń ákimi Jamantaı Beısenbaevtyń aıtýynsha, maqta baǵasyn kóterý ári naqtylaý máselesinde zaýyt basshylaryn ortaq sheshimge kelýi tıis. Ári bul sheshim sharýalarǵa da tıimdi bolýy kerek. Sondaı-aq, aýdan basshysy maqta qabyldaý beketterin talapqa saı jumys isteýge, kúzgi jıyn-terimdi tıimdi uıymdastyrý qajettigine toqtaldy.
Jergilikti zaýyt basshylary aldaǵy birer kúnde baǵa máselesin aqyldasyp, sharýaǵa da, zaýytqa da tıimdi ortaq baǵa belgileýge ózara kelisim jasaýǵa ýaǵdalasty.
Aıta keteıik, ázirge óńirde maqta terý naýqany bastalǵan. Jergilikti zaýyttar aq altynnyń baǵasyn tonnasyna 170 myń teńgeden belgilegen bolatyn. Básekelestik ortada maqtanyń baǵasy 200 myń teńgege deıin kóteriledi degen boljam bar.
