Túrkistan oblysynda maqta terý naýqany bastaldy
TÚRKІSTAN. QazAqparat - Túrkistan oblysynda 125,8 myń gektar jerge egilgen maqta daqylynan 331 myń tonna shıtti maqta jınaý josparlanyp otyr, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.
Oblysta maqta ósirýmen 25 myńnan astam sharýa aınalysady jáne egistik jerler maqta ósirýge beıimdelip, sharýalar ozyq tájirıbe qoldaný nátıjesinde mol ónimge qol jetkizip otyr. Qazirgi tańda Jetisaı, Maqtaaral aýdandary men Kentaý qalasynda maqta terý naýqany bastaldy. Ónimdiligi gektaryna 25 tsentnerdi qurap otyr.
Maqta terýdi alǵashqylardyń biri bolyp bastaǵan Maqtaaral aýdany Jambyl aýyldyq okrýgindegi «Araı» sharýa qojalyǵy. Atalǵan qojalyq 5,5 gektar jerge «Maqtaaral 4017» maqta sortyn ekken. Sharýa ortasha eseppen gektarynan 27 tsentnerden ónim alýda. Bul jumystarǵa aýyl turǵyndary tartylyp, terilgen maqtanyń árbir kelisine 30 teńgeden eńbekaqy tólenýde.
Búginde aýdan boıynsha maqta terý naýqanyna 15 brıgada, 403 adam qatysýda. Qazirgi tańda negizinen qol terim jumystary júrgizilip, 125 gektar maqta alqabynan 269,5 tonna «aq altyn» qambaǵa jınaldy.
Maqta terý naýqanyna daıyndaý úshin kombaındarǵa jóndeý jumystary tolyqtaı júrgizilgen. Qosymsha aýdanǵa AQSh-tan maqta teretin 23 dana «Djon-Dır» kombaıny satyp alynǵan. Sondyqtan, byltyrǵyǵa qaraǵanda bıyl kombaınnan qıyndyq týmaıdy. Osynyń arqasynda maqtany mashınalyq ádispen terý 66%-ǵa jetetin bolady. Jalpy bıylǵy maqta terý naýqanyna 514 traktor, 1206 tirkeme jáne 151 kombaın qatysady dep josparlanyp otyr.
Byltyr aýdanda maqta óndiretin 5 zaýyt jáne maqta qabyldaıtyn 60-tan astam beket sharýalarǵa qyzmet kórsetken edi. Bıyl da bul óndiris oryndary jıyn-terim naýqanyna daıyndalýda.
Túrkistan oblysy aýyl sharýashylyǵy basqarmasynyń málimetinshe, aýyl sharýashylyǵy taýaryn óndirýshilerge, sonyń ishinde maqta sharýashylyǵyn damytýǵa memleket tarapynan qomaqty qoldaý kórsetilip jatyr. Máselen, kúzgi dala jumystaryn júrgizýge 39,2 myń tonna janar-jaǵarmaı bólinip, agroqurylymdarǵa bir lıtri 161-163 teńge kóleminde berilýde. Sonymen qatar, qolda bar 457 maqta teretin kombaınnyń 92%-y naýqanǵa daıyn.
