Túrkistan oblysynda lımon baǵynan alǵashqy ónim alyndy
TÚRKІSTAN. QazAqparat - Túrkistan oblysy Saıram aýdanynda ornalasqan «Shymyr-Medet» jylyjaıynda lımon aǵashtary alǵashqy jemisin bere bastady. Jylyjaıdyń jalpy kólemi 1 gektar aýmaqty quraıdy. Onda 2000 túp lımon kósheti otyrǵyzylǵan, dep habarlaıdy QazAqparat óńirlik kommýnıkatsııalar qyzmetine silteme jasap.
«2017 jyly jylyjaı isin qolǵa alǵan bolatynmyn. Araǵa 3 jyl salyp tókken terdiń jemisin kórý baqyty buıyrypty, qýanyshtymyn árıne. Qandaı da bir sharýa bolmasyn aldymen qyzyǵýshylyq tanytý kerek. Ózim zeınet jasyndamyn. Eńbek etken adam ǵana nátıjege qol jetkizetindigi anyq»,- deıdi jylyjaı ıesi Zeınep Joldasova.
Qaınarbulaq aýyl okrýgindegi lımon baǵy jabyq topyraqta ósiriletin oblys kólemindegi eń úlken jylyjaı bolyp tabylady. Jylyjaı isi búginde otbasylyq kásipke aınalǵan. Jospar boıynsha kásipker ónim jınalsa, oblys aımaǵy men Shymkent qalasynda saýdalaýdy josparlap otyr.
