Túrkistan oblysynda laýazymdy polıtseı «ózinshe bılik etý» kúdigimen qamaldy

ShYMKENT. QazAqparat - Búgin Shymkent qalalyq polıtsııa departamenti Ózindik qaýipsizdik basqarmasynyń qyzmetkerleri Túrkistan oblysyndaǵy Túlkibas aýdandyq polıtsııa bóliminiń bastyǵyn ustady. Ol «ózinshe bılik etti» degen kúdikpen qamaýǵa alyndy, dep habarlaıdy QazAqparat tilshisi.

Shymkent qalalyq PD baspasóz qyzmetiniń málimetinshe, kúdikti qazir ýaqytsha ustaý ızolıatorynda otyr.

«QR QK-niń 389-baby «ózinshe bılik etý» boıynsha sotqa deıingi tergeý amaldary bastaldy» delingen baspasóz qyzmetiniń habarlamasynda.

Aıta keteıik, buǵan deıin áleýmettik jelide Túlkibas aýdandyq polıtsııa bólimi bastyǵynyń Shymkenttegi avtosalondardyń birinen kólikti zańsyz aıdap ketkeni týraly aqparat taraǵan edi. Polıtsııa podpolkovnıginiń «GCA-Ońtústik» JShS-ne qarasty avtosalonnan «Kıa Sarento» kóligin óz betimen minip ketkeni aıtylǵan bolatyn.

Eske salsaq, Túrkistan oblysynda jalǵan nómirmen júrgen 8 kólik anyqtaldy.