Túrkistan oblysynda latyn álipbıine arnalǵan semınarlar ótedi

TÚRKІSTAN. QazAqparat - Túrkistan qalasyna «Latyn negizdi álipbı men emle erejesi týraly nasıhat» jobasy boıynsha ǵalymdardan quralǵan nasıhattyq top keldi. Belgili memleket jáne qoǵam qaıratkeri Orazkúl Asanǵazy men Nazarbaev ýnıversıtetiniń professory Jazıra Aǵabekova bastaǵan top oblys ákimi  Janseıit Túımebaevpen kezdesti, dep habarlaıdy QazAqparat tilshisi.

Basqosýda latyn álipbıin nasıhattaýǵa baılanysty  semınarlar barysy baıandaldy. QR Mádenıet jáne sport mınıstrligi Til saıasaty komıteti jáne Sh.Shaıahmetov atyndaǵy «Til Qazyna» ulttyq ǵylymı-praktıkalyq ortalyǵy uıymdastyratyn sharalar barysy  Túrkistan oblysynyń óńirlik kommýnıkatsııalar qyzmetinde ótken brıfıngte de aıtyldy. Onda sala mamandary latyn álipbıiniń mán-mańyzy men emle-erejesine keńirek toqtaldy.

«Qazirgi tańda emle.kz saıty jumys isteıdi. Onda barlyq azamattar latyn álipbıimen tanysyp, usynys-tilekterin joldaı alady. Latyn álipbıi bizdiń tarıhymyzda bolǵan. Sondyqtan qaıta oralý qıynǵa soqpaıdy. Jańa jasaqtalǵan latyn álipbıi arqyly syrttan sóz alǵanda ózimizdiń tól dybystarymyzǵa rettep alatyn bolamyz. Bul Baıtursynov syndy qaıratkerlerimizdiń bastamasy», - dedi Orazkúl Asanǵazy.
 

Baspasóz máslıhatynda ǵalym Jazıra Aǵabekova jańa álipbı 2019 jyldan bastalyp kezeń-kezeńimen satylap engiziletinin atap ótti.

«Qazirgi kırıllıtsamen aıtylyp júrgen sózder aldaǵy ýaqytta tól dybystarymyzben oqylatyn bolady. Biz osylaı ulttyq artıkýlıatsııamyzdy saqtaýymyz qajet. Aldaǵy ýaqytta oqý ortalyqtary men til basqarmalary janynan oqytý jáne biliktilikti arttyrý kýrstary ashylyp, mektep, joǵary oqý oryndary men memlekettik qyzmet salasynda 2025 jylǵa deıin satylap engiziletin bolady. Sondaı-aq, aldaǵy ýaqytta jańa emle boıynsha orfografııalyq, orfoepııalyq sózdikter jasalady», - dedi Jazıra Aǵabekova.

Aıta keterligi, aǵymdaǵy jyldyń 14 qarashasy kúni qazaqstandyqtar latyn álipbıinde jappaı dıktant jazý aktsııasyna qatysatyn bolady.