Túrkistan oblysynda qyzmetin minsiz atqarǵan polıtseıler marapattaldy
TÚRKІSTAN. QazAqparat - Túrkistan oblysyna qarasty Saıram aýdanynda Qazaqstan polıtsııasy kúnine oraı saltanatty is-shara uıymdastyryldy. Oǵan ardagerler pen aýdan ákimi Baqtııar Mamaev, jergilikti ishki ister qyzmetkerleri men qaıtys bolǵan polıtseılerdiń týystary qatysty, dep habarlaıdy QazAqparat tilshisi.
Saltanatty sharada saıramdyq tártip saqshylaryn quttyqtaǵan aýdan basshysy el tynyshtyǵyn kúzetken qyzmetkerlerge jemisti eńbek, otbasylaryna amandyq tilep, júrekjardy lebizin bildirdi. Qazaqstan Respýblıkasynyń Іshki ister organynyń 26 jyldyǵyn merekeleýge oraı ózderine júktelgen qyzmettik mindetterin minsiz atqaryp, qıyn da jaýapty jumystarynda jaqsy nátıjelerge qol jetkizgen 30-ǵa tarta tártip saqshysy oblystyq Іshki ister departamenti men aýdan ákimdigi, «Nur Otan» partııasy aýdandyq fılıalynyń gramotalarymen marapattaldy.
Jıynda sóz alǵan Saıram aýdandyq ІІB-nyń bastyǵy Ermahan Abdramanov qoǵamdyq tártipti saqtaý barysynda atqarylǵan aýqymdy sharalardy baıandap ótti.
«Polıtsııa qyzmeti táýekelmen baılanysty ekeni bárimizge belgili. 26 jyl boıy polıtsııa qyzmetkerleri elimizdegi tynyshtyq pen táýelsizdikti saqtaý jolynda talmaı eńbek etýde. Aýdanymyzda qoǵamdyq tártipti qamtamasyz etý jáne jol-kólik oqıǵalarynyń aldyn alý maqsatynda aýdan ákimdiginiń qoldaýymen táýlik boıy jumys isteıtin 23 beınebaqylaý kameralary ornatylyp, iske qosyldy. Aýdan kóleminde 15 ýchaskelik polıtsııa beketi ashylyp, azamattardyń Konstıtýtsııalyq quqyqtaryn qorǵaý baǵytynda jumystar atqarylýda»,- dedi Saıram aýdandyq ІІB bastyǵy Ermahan Abdramanov.
Sharanyń marapattaý rásiminen keıin polıtsııa qyzmetkerlerine kontserttik baǵdarlama uıymdastyrylyp, patrıottyq ánder oryndaldy.
