Túrkistan oblysynda qysqy sor shaıý jumystary júrgizilýde
MAQTAARAL.QazAqparat – Túrkistan oblysy, Maqtaaral aýdanynda qysqy sor shaıý jumystary qarqyndy júrip jatyr. Qazirgi tańda óńirdiń kúre tamyry sanalǵan Dostyq kanalynan sekýndyna 42 tekshe metr aǵyn sý berilýde, dep habarlaıdy QazAqparat tilshisi.
Aýdandyq aýyl sharýashylyǵy bóliminiń basshysy Ǵalym Dúısenbekov sý arnalary men sýarmaly jerlerdi aralap kórdi. Onyń aıtýynsha, aýdanǵa qarasty aýyldyq okrýgterde 23 aýylsharýashylyq óndiristik kooperatıv bar. Sonyń ishinde búgingi tańda 21 kooperatıvpen kelisimshart jasalyp, sekýndyna 45,25 tekshe metr aǵyn sý alýǵa suranys túsken. Óńirde 61 myń gektarǵa jýyq sýarmaly jer bar bolsa, búgingi tańda 56 413 gektar jer aıdalǵan. Qysqy sor shaıý úshin 47 973 gektar jerge pal alynǵan. Kanaldar men sýarmaly jerlerdi arnaıy baqylap kelgen aýyl sharýashylyǵy bóliminiń basshysy qalǵan jerlerge de pal aldyrý úshin sharýalarǵa túsindirý jumystary júrgizilip jatqanyn atap ótti.
«Palsyz sor shaıý jumystaryn júrgizý - aǵyn sýdy ysyrap qylýǵa alyp keledi. Sondaı-aq, egistik jerdi jaǵalaı ornalasqan joldardyń buzylýyna sebep bolady. Sondyqtan, aýdanymyzdyń sharýalaryna bul baǵytta túsindirý jumystary júrgizilip jatyr», - dedi Ǵalym Dúısenbekov.
Aıta keteıik, ótken jyldyń 1 qazanynda «Qazsýshar» RMK Túrkistan fılıalynyń Maqtaaral óndiristik bólimshesi Maqtaaral jáne Jetisaı óndiristik bólimsheleri bolyp qaıta quryldy. Sol kúnnen bastap Maqtaaral óndiristik bólimshesiniń mamandary qysqy sor shaıý naýqanyna daıyndyq jumystaryna kirisip, kanaldar tazalaý men kollektorlardy retke keltirýde. Qazirgi tańda «Irrıgatsııalyq-drenajdyq júıelerdi jetildirý - 2» jobasy boıynsha qurylys jumystary toqtap, buǵan deıin jalpy uzyndyǵy 16 shaqyrymdy quraıtyn 9 kanaldyń qurylys jumystary tolyq aıaqtalǵan. Qysqy sor shaıý maýsymy aıaqtalǵan soń, qurylys jumystary qaıta jalǵasady dep kútilýde. Maqtaaral óndiristik bólimshesi esebinde uzyndyǵy 224,7 shaqyrymdy quraıtyn 23 dana sharýashylyqaralyq qashyrtqysy bar. Sol sekildi 130 dana tik drenajdy uńǵymalar jumys jasaýda. «Irrıgatsııalyq-drenajdyq júıelerdi jetildirý - 2» jobasy aıasynda taǵy 145 dana tik drenaj qaıta qalpyna keltiriletin bolady.
Foto: dknews.kz
