Túrkistan oblysynda qymbat kólikterdi urlap kelgen qylmystyq top ustaldy
Qylmystyq toptyń músheleri eki kólikti Aqtóbe qalasynda qoldy etse, qalǵan úsheýin Túrkistan men Qyzylorda oblystarynda aıdap ketken. Al, kólikterdiń esigin ashý úshin arnaıy baǵasy 5 mıllıon teńge turatyn qurylǵyny paıdalanǵan. Tártip saqshylary urlanǵan 4 kólikti Aqtóbe oblysynyń turǵyndary arzan baǵada satyp alǵanyn anyqtady. Olardy jedel ýákilder Shymkent qalasy men Aqtóbe jáne Qostanaı oblystarynda ustady. Al bir satyp alýshyǵa qatysty izdeý jarııalanǵan.
«Shymkent qalasynda polıtseıler urlanǵan «Toıota Kamrı-55« avtokóligin tárkiledi. Ony kúdiktiler 4 mıllıon teńgege satyp úlgergen jáne urlanǵan avtokóliktiń esigin ashqan elektrondy skaner apparaty da aıǵaqty zat retinde alyndy.Túrkistan qalalyq polıtsııa basqarmasyna jergilikti turǵyn belgisiz tulǵalardyń onyń «Toıota Kamrı-55« markaly avtokóligin urlap ketkeni týraly aryzdanǵan. Arnaıy júrgizilgen operatsııa nátıjesinde bizdiń jedel ýákilder 4 kúdiktini ustady. Olardyń tórteýi Aqtóbe oblysynyń turǵyndary, onyń ishinde ekeýi destrýktıvti dinı aǵymnyń músheleri bolyp shyqty. Ustalǵandardyń úsheýi buryn qaraqshylyq jáne qarý saqtaǵany úshin sottalǵan. Kúdiktiler qamaýǵa alyndy. Tergeý barysynda qylmystyq top músheleriniń aldyn-ala josparlanǵan syzba boıynsha, árqaısysy óz rólin somdaý arqyly áreket etkeni anyqtaldy. Kúdiktiler quny 10 mıllıon teńgeden asatyn avtokólikterdi arnaıy skanerleý qurylǵysynyń kómegimen ashqan. Olar avtokólik ıelerin baqylap, esikterin ashqan kezde elektrondy qulyptardy skanerlegen. Seziktiler qymbat kólikke qol jetkizgennen keıin, olardy turaqtan nemese kóshelerden urlap, aıdap áketken»,- deıdi Túrkistan oblystyq PD bastyǵynyń orynbasary Qurmanbek Sahov.
Qazirgi ýaqytta sotqa deıingi tergeý jumystary jalǵasýda. Sondaı-aq kúdiktilerdiń basqa da osyndaı qylmystarǵa qatysy bar-joǵy anyqtalýda