Túrkistan oblysynda qymbat avtokólikterdi urlaǵan aǵaıyndylar ustaldy
TÚRKІSTAN. QazAqparat – Túrkistan oblysynda qymbat avtokólikterdi urlap júrgen aǵaıyndylar ustaldy. Krımınaldyq polıtsııa basqarmasynyń qyzmetkerleri seziktilerdi Shymkentte qolǵa túsirgen, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, tamyz aıynyń basynda Saryaǵash aýdandyq PB-na Reseı Federatsııasynyń azamaty aryzdanǵan. Ol Jibek joly aýylynyń avtoturaǵynan «Toıota Land Krýzer 200» markaly avtokóligin urlap ketkenin aıtqan. Jábirlenýshige 20 mıllıon teńgeden astam shyǵyn (3,5 mıllıon Reseı rýbli) kelgen. Atalǵan qylmysty ashý maqsatynda Krımınaldyq polıtsııa jáne tergeý bóliminiń tájirıbeli qyzmetkerleri qatarynan jedel-tergeý toby qurylǵan. Qajetti jedel-izdestirý sharalaryn júrgizý kezinde qylmys orny men beınebaqylaý kameralary muqııat tekserilip, kýágerlerden suraq-jaýaptar alynǵan. Nátıjesinde tártip saqshylary kúdiktilerdiń izine túsip, olar Shymkent qalasynda ustaldy. Qolǵa túsken eki aǵaıyndy jigit megapolıs turǵyndary ekeni belgili boldy. Sondaı-aq, kóp uzamaı-aq Qaraǵandy qalasynan urlanǵan kólikterdi satyp alǵan azamat ta qamaýǵa alyndy.
«Atalǵan jaıt Saryaǵash PB-da QR QK-niń 188-baby »Urlyq«boıynsha tirkeýge alynyp, qylmystyq is qozǵaldy. Qazirgi ýaqytta kúdiktiler Túrkistan oblysyna jetkizildi. Polıtsııa qyzmetkerleri bul qylmystyq toptyń basqa da qymbat kólikter urlyǵyna qatysy bar ekendigin joqqa shyǵarmaıdy. Ustalǵan úsh kúdikti de qamaýda. Sotqa deıingi tergeý amaldary júrgizilýde», delingen habarlamada.
