Túrkistan oblysynda qylmystyq top kólik jáne kompıýter urlyǵymen aınalysyp kelgen
TÚRKІSTAN. QazAqparat - Túrkistan oblysynda tártip saqshylary kólik jáne kompıýter urlyǵymen aınalysyp kelgen qylmystyq toptyń múshelerin ustady. Eki kúdikti qarasha aıynda ustalsa, taǵy ekeýi Almaty qalasy men Saıram aýdanynda qolǵa tústi, dep habarlaıdy QazAqparat tilshisi.
Shymkent qalasy turǵyndarynan quralǵan top qylmysyn Saıram aýdanynda jasap kelgen. Aldymen oıynhananyń 9 kompıýterin, keıinnen mekteptiń 7 noýtbýgyn qoldy etken. Jedel izdestirý sharalarynyń nátıjesinde toptyń tórt múshesi de ustaldy. Jeke tulǵalaryn anyqtaý barysynda olardyń buryn sottalǵany málim boldy.
Tártip saqshylary sondaı-aq urlanǵan zattardy satyp alyp otyrǵan Túrkistan oblysynyń turǵynyn da qolǵa túsirdi. Qazirgi tańda osy toptyń 20 urlyq deregine qatysy bary jáne jábirlenýshilerge 10 mln teńgeden asa shyǵyn keltirgeni anyqtalyp otyr.
Aıǵaqty zattar tárkilenip, seziktilerge qatysty Qylmystyq kodekstiń 188-baby «Urlyq» jáne 200-baby «Avtomobıldi nemese ózge de kólik quralyn ıelenip alý» boıynsha sotqa deıingi tergeý amaldary júrgizilýde.
