Túrkistan oblysynda qylmystyq top 70 mln teńgeniń malyn urlaǵan
TÚRKІSTAN. QazAqparat – Túrkistan oblysynda 70 mln teńgeniń malyn urlaǵan qylmystyq top músheleri ustaldy. Bul týraly oblystyq Polıtsııa departamentiniń basshysy Qaırat Dálbekov brıfıng barysynda málim etti, dep habarlaıdy QazAqparat tilshisi.
Polıtsııa general-maıory Qaırat Dálbekovtiń aıtýynsha, barymtashylar toby Túrkistan jáne Kentaý qalalarynyń aýmaǵynda tórt túlikti qoldy etip kelgen. Olar úsh jyldyń ishinde 150-den astam jylqy men sıyr urlaǵan. Kúdiktiler kentaýlyq turǵynnyń polıtsııaǵa aryzynan keıin izdestirile bastaǵan.
«Kentaýlyq turǵyn 20-dan astam jylqysy joǵalyp ketkenin aıtty. Oqıǵa ornyna shyqqan Krımınaldyq polıtsııa qyzetkerleri, ıaǵnı jedel ýákilder jaqyn mańdaǵy barlyq aýmaqtar men jaıylymdardy aralap, kórgen adamdar men aýyl turǵyndarynan surastyrǵan. Mal tasymaldaıtyn avtokólikterdi jáne mal satyp alatyn oryndardy muqııat tekserip shyqty. Jedel-izdestirý is-sharasy barysynda osy qylmysqa qatysy bar degen Túrkistan men Kentaý qalasynyń 5 kúdikti turǵynyn, onyń ishinde urlanǵan maldardy satyp alýshyny da ustady. Tergeý barysynda barymtashylardyń 125 jylqy men 30 bas iri qara maldyń urlyǵyna qatysy bar ekendigi anyqtaldy. Búgingi tańda 2017-2020 jyldar aralyǵynda mal urlyǵynyń 19 jaıtyna qatysy bary belgili boldy», - dedi Qaırat Dálbekov.
Polıtsııa departamenti bastyǵynyń sózinshe, qylmystyq toptyń quramyndaǵylardyń árqaısysy ózine júktelgen mindetti oryndaǵan. Biri maldy jaıylymnan urlap tursa, basqalary qora-jaılarǵa jasyrýmen aınalysqan. Taǵy biri urlanǵan maldy satqan nemese satý úshin soıyp otyrǵan.
Kúdiktilerdiń úıin tintý kezinde tártip saqshylary 18 bas jylqy men 9 sıyrdy tárkilep, olardy zańdy ıelerine qaıtarǵan.
«Qazirgi ýaqytta atalǵan jaıt boıynsha sotqa deıingi tergeý amaldary júrgizilýde. Jábirlenýshilerge keltirilgen shyǵynnyń jalpy kólemi 70 mıllıonnan astam teńgeni qurady. Kúdiktiler qamaýǵa alyndy. Polıtsııa qyzmetkerleri ustalǵandardyń basqa da osyǵan uqsas mal urlyǵy derekterine qatystylyǵyn anyqtaýda», - dedi Qaırat Dálbekov.
