Túrkistan oblysynda qylmystyq top 106 mln teńgeniń malyn urlaǵan
ShYMKENT. QazAqparat - Túrkistan oblysynda mal urlyǵynyń 31 faktisine qatysy bar uıymdasqan qylmystyq top músheleri ustaldy. Keltirilgen shyǵyn kólemi - 106 mln teńge, dep habarlaıdy QazAqparat tilshisi.
Oblystyq ІІD baspasóz qyzmetiniń málimetinshe, qylmystyq top múshelerin ustaýǵa jábirlenýshilerden jappaı aryzdar túsýi negiz bolǵan. Іsti jan-jaqty tekserý úshin oblystyq ІІD Krımınaldyq polıtsııa basqarmasynyń, Tergeý basqarmasynyń jáne Tólebı, Saıram, Qazyǵurt, Túlkibas, Ordabasy aýdandarynyń qyzmetkerlerinen arnaıy jedel-tergeý toby quryldy. Polıtseıler júrgizgen jedel-izdestirý sharalary kezinde uıymdasqan qylmystyq toptyń jospary ashylyp, olardyń ár múshesiniń óz roli bolǵany anyqtaldy. Ustalǵandardyń barlyǵy Shymkent qalasy men Túrkistan oblysynyń turǵyndary bolyp shyqty. Urlanǵan jylqylardyń bir bóligi aıǵaqty zat retinde alynyp, ıelerine qaıtarylǵan.
«Seziktiler qylmystaryn Tólebı, Saıram, Qazyǵurt, Túlkibas, Ordabasy aýdandarynda júzege asyrǵan. Qylmystyq toptyń uıymdastyrýshysy ár toptyń múshesine óz rolin belgilip qoıǵan jáne urlanǵan maldy satyp, aqshany ózara bólip otyrǵan. Urlanǵan maldardy Shymkent qalasyndaǵy óz úıindegi qorasynda ustap, keıin oblystyń basqa aýdandaryndaǵy mal bazarlarynda satqan», - delingen habarlamada.
Kúdiktiler kinásin tolyǵymen moıyndap otyr. Atalǵan jaıt boıynsha QR QK-niń «Uıymdasqan qylmystyq topty qurý jáne oǵan basshylyq etý» jáne «Іri mólsherde jasalǵan urlyq» baptary boıynsha sotqa deıingi tergeý amaldary júrgizildi. Túrkistan oblystyq ІІD tergeýshileri isti sotqa joldady.
