Túrkistan oblysynda qylmys sany edáýir tómendedi
TÚRKІSTAN. QazAqparat - Elimizde tótenshe jaǵdaı jarııalanǵaly beri Túrkistan oblysynda qylmys sany aıtarlyqtaı tómendegen, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.
Oblystyq polıtsııa departamentiniń qyzmetkerleri júrgizgen jedel-izdestirý jáne aldyn alý is-sharalarynyń nátıjesinde bıylǵy jyldyń 3 aıynda ótken jyldyń osy kezeńimen salystyrǵanda jasalǵan qylmys sany 18,2 %-ǵa azaıǵan.
«Qoǵamdyq oryndarda jasalǵan qylmys sany 25,7 paıyzǵa, kósherde jasalǵan qylmys 26,2 paıyzǵa tómendedi. Jol kólik oqıǵalarynyń sany ótken jylmen salystyrǵanda 17,7 paıyzǵa azaıǵan. Sonyń arqasynda ólim-jitim 36,6 %-ǵa jáne jaraqat alǵan azamattar sany 21,1 paıyzǵa azaıǵan. Osy ýaqyt aralyǵynda bótenniń múlkin urlaý, tonaý, qaraqshylyq, zorlaý sany da qysqarǵan», delingen habarlamada.
Oblys boıynsha búgingi kúni 61 blok beket jumys isteıdi. Onyń ekeýi respýblıkalyq mańyzy bar joldarda ornalasqan. Onda da 300-ge jýyq polıtsııa qyzmetkeri kúsheıtilgen rejımde jumys isteıdi. Tártip saqshylary kúni búginge deıin blok beketterde 100 myńnan astam júk, jeńil jáne jolaýshylar avtokóligin teksergen.
Túrkistan oblysynyń polıtseıleri azamattardy tótenshe jaǵdaı rejımin saqtaýǵa shaqyrady. Karantın tártibine túsinistikpen qarap, asa qajet bolmaǵan jaǵdaıda úıden shyqpaýǵa keńes beredi. Tártip saqshylary osy maqsatta oblys aýmaǵynda qoǵamdyq tártipti buzǵan jaǵdaıda azamattardy jaýapkershilikke tartý, halyqtyń qaýipsizdigin qamtamasyz etýge turaqty baqylaý júrgizip jatyr.
Máselen, tótenshe jaǵdaı rejımi bastalǵaly beri oblys polıtseıleri 200-den astam zań buzýshylyqty anyqtady. Onyń ishinde 80 tártip buzýshyǵa qatysty ákimshilik aıyppul salynyp, 4-ýine eskertý jasalyndy jáne 50-den astam turǵyn ákimshilik qamaýǵa alyndy. Sotta 59 ákimshilik is qaraldy. Jalǵan aqparatty taratýdyń 9 jaıty anyqtaldy. Tekserý sharalary júrgizilip, jalǵan aqparat taratýshylar QR QK 274-baby boıynsha jaýapkershilikke tartylǵan.
