Túrkistan oblysynda qurylǵan shuǵyl shtab koronavırýsqa qarsy jumysty kúsheıtti
TÚRKІSTAN.QazAqparat - Túrkistan oblysynda Qytaı elinen shyqqan qaýipti indetke qarsy jumystar pysyqtaldy. Bul týraly barlyq jaýapty sala basshylary qatysqan óńirlik shuǵyl shtab otyrysynda málimdendi, dep habarlaıdy QazAqparat tilshisi.
Jumys toby álemdi dúrliktirgen koronovırýstyń aldyn alý jumystardyń kúsheıtilgenin atap ótti. Jıynǵa tóraǵalyq etken Túrkistan oblysy ákiminiń orynbasary Joldymurat Amanbaev basqarma basshylaryna jaǵdaıdy baqylaýda ustaýdy tapsyrdy. Sheshýin keıinge qaldyrmaýdy talap etetin negizgi máseleler ortaǵa salynyp, koronovırýs ınfektsııasynyń taraýyna jol bermeý sharalarynyń keshendi jumys jospary bekitildi.
Oblysqa qarasty 5 qorǵanys beketinde qyraǵylyqty kúsheıtip, shuǵyl daıyndyqta bolý basa aıtyldy. Aýrýdyń belgileri baıqalyp, kúdik týyndaǵan jaǵdaıda naýqas shuǵyl túrde 14 kúnge oqshaýlanatyn boldy. Tıisti synama taldaýlary Almaty qalasyndaǵy qaýipti ınfektsııalardy baqylaý Ulttyq ǵylymı ortalyǵyna joldanady. Tapshylyq bolmas úshin betperde shyǵaratyn mekemelerge olardyń sanyn arttyryp, baǵanyń sharyqtaýyna jol berilmeý kerektigi eskertilgen.
Zalalsyzdandyrý jumystaryn júrgizýge qajetti barlyq medıtsınalyq dári-dármekter men kerek-jaraqtar, arnaıy kıimder de jetkilikti. Aýdandar qosymsha kólik kapsýlalarymen qamtylmaq. Aldaǵy ýaqytta óńirde sanıtarlyq-epıdemıologııalyq jaǵdaıdyń turaqtylyǵyn saqtaý jáne aldyn-alý sharalaryn kúsheıtý boıynsha qurylǵan jumys tobynyń otyrysy júıeli túrde ótkiziletin bolyp kelisildi. Jalpy, Túrkistan oblysy boıynsha jaǵdaı turaqty jáne saqtyq sharalary qatań baqylaýda, - deıdi sala mamandary.
