Túrkistan oblysynda qoıshy aýyldan jolǵa shyqqan 4 azamat joǵalyp ketti
Túrkistan oblystyq tótenshe jaǵdaılar departamentiniń basqarma basshysy Talǵat Dosalıevtyń aıtýynsha, óńirde 3 qańtar kúni ońtústik-batystan sekýndyna 15-20 metr jyldamdyqpen qatty jel turǵan.
Taýly aýdandarda qar aralas jańbyr jaýyp, asýlarda jeldiń ekpini 30 m/s-tan asqan.
Borandy kúni Qazyǵurt aýdanyndaǵy qoıshy aýyldan jolǵa shyqqan 4 azamat qaıtyp oralmaǵan.
Qazir olardy izdeý jumystary júrip jatyr. Bul iske 4 tehnıka men 5 adam jumyldyrylǵan.
«Tólebı aýdany Abaı aýyly Kemeqalǵan kóshesinde qatty jeldiń saldarynan ortasha qysymdy jerústi gaz qubyryna aǵash qulap, 80 abonent gazsyz qaldy. Sonymen qatar, Qoshqar ata kóshesinde 100 abonent kógildir otynnan ajyratylǵan. Bul másele boıynsha «Qaztransaımaq» AQ qyzmetkerleriniń kómegimen gaz berý jumysy qalpyna keltirildi. Sondaı-aq, Arys qalasynda qar aralas jańbyrdyń tolassyz jaýýynan 20 turǵyn úıdiń aýlasyna sý kirgen. Tótenshe jaǵdaıdy qalpyna keltirý úshin oblystyq tótenshe jaǵdaılar departamenti 1 tehnıka, 2 motopompa, 9 adam jumyldyrdy. Budan ózge, departamenttiń 25 qyzmetkeri, 5 tehnıkasy jumyldyrylyp Sozaq, Báıdibek aýdandarynda qar qursaýynda qalǵan 10 jeńil avtokólik, 2 jolaýshylar avtobýsy men 4 júk avtokóligi shyǵarylyp, 92 adam qutqaryldy», - dedi Talǵat Dosalıev.
Ashyq kózderden alynǵan foto
