Túrkistan oblysynda kórshisin kirpishpen uryp óltirgen kúdikti ustaldy
ORDABASY. QazAqparat - Túrkistan oblysynyń Ordabasy aýdanynda kisi ólimi boldy, dep habarlaıdy QazAqparat oblystyq polıtsııa departamentine silteme jasap.
Ordabasy APB kezekshi bólimine «102» telefony arqyly jergilikti turǵynnan Shubar aýylyndaǵy qurylysy tolyq aıaqtalmaǵan úıdiń ishinde er adamnyń máıiti jatqany týraly habarlama túsken. Habarlama boıynsha polıtseıler shuǵyl áreket etip, Ordabasy APB bastyǵy, polıtsııa podpolkovnıgi Ǵalymjan Qýashbaev jáne jedel tergeý toby oqıǵa ornyna jetti.
Tártip saqshylary jábirlenýshi jaraqatyna qarap, onyń ólimine basynan alǵan soqqysy sebep bolýy múmkin ekenin anyqtady. Keıinnen bul nusqany saraptama qorytyndysy da rastady. Atalǵan jaıt QR QK 99-baby 1-bólimimen tirkelip, sotqa deıingi tergeý amaldary bastaldy.
Aýyr qylmysty ashý maqsatynda Túrkistan oblysy PD Krımınaldyq polıtsııa basqarmasynyń tájirıbeli jedel ýákilderi jáne Ordabasy APB jeke quram qyzmetkerlerinen arnaıy top quryldy. Jedel ýákilder aýlalardy aralap, ólgen adamnyń kim ekenin anyqtady. Ol jumyssyz jergilikti turǵyn bolyp shyqty.
Odan ári jedel top jábirlenýshiniń tanystar sheńberin quryp, muqııat zertteı bastady. Kórgen-bilgenderden jaýap aldy. Osyndaı is-sharalardyń arqasynda polıtseıler kúdiktiniń izine tústi. Sodan ony polıtsııa qyzmetkerleri Arys qalasynda qaraýyldyq jumysynda júrgen jerinen anyqtap ustady. Kúdikti qaza tapqan adamnyń kórshisi bolyp shyqty.
Tergeý barysynda kúdikti tanysy ári kórshisimen Shubarsý aýylyndaǵy tolyq bitpegen úıde birge spırttik ishimdik ishkenin aıtyp berdi. Sol sátte aralarynda janjal shyǵyp, sózge kelispeı qalǵan olar tóbelesken. Oqıǵa kezinde er adam kórshisiniń basynan kirpishpen urǵanyn moıyndady.
Qazirgi ýaqytta qylmystyq is boıynsha sotqa deıingi tergeý amaldary júrip jatyr. Saraptama taǵaıyndaldy, Polıtseıler oqıǵanyń tolyq mán-jaıyn anyqtaýda. Kúdikti qamaýǵa alyndy.
