Túrkistan oblysynda koronavırýstyń ekinshi tolqynyna daıyndyq kúsheıdi

TÚRKІSTAN. QazAqparat – Túrkistan oblysynyń koronavırýs ınfektsııasynyń ekinshi tolqynyna daıyndyq barysy, partııaishilik praımerızdiń nátıjeleri, turaqtandyrý qorynyń azyq-túlik taýarlary baǵasynyń ósýine jol bermeýge áseri jáne Túrkistan aınalasyndaǵy «Jasyl beldeýdi» damytý máseleleri óńir ákimi Ómirzaq Shókeevtiń tóraǵalyǵymen ótken lezdemelik májiliste qaraldy, dep habarlaıdy QazAqparat tilshisi.

Apparat otyrysynda «Nur Otan» partııasy Túrkistan oblystyq fılıaly tóraǵasynyń birinshi orynbasary Beısen Tájibaev partııaishilik praımerız qoǵamda qyzý qoldaý tapqanyn baıandady. Іrikteýge 1074 adam túsken. 1-4 qazan aralyǵynda ótken daýys berýge 245 bastaýysh partııa uıymynan 78 262 adamnyń 72 973-i qatysty. Oblystyń aýdan, qalalarynda ashylǵan 209 daýys berý oryndarynda karantın talaptary qatań saqtaldy.

Túrkistan oblysynda koronavırýstyń ekinshi tolqynyna daıyndyq kúsheıdi. Іndet qaıta beleń alǵan jaǵdaıda dári tapshylyǵy bolmas úshin eki aılyq qor jınalyp, oblys aýrýhanalary tynys alý apparattarymen qamtylýda. Qosymsha tósek-oryndar qajet bolǵan jaǵdaıda onyń sany 5,5 myńǵa deıin jetkiziledi. Oblys basshysynyń tapsyrmasymen aýdandyq aýrýhanalar kompıýterlik tomograftarmen, PTR zerthanalarymen jáne tsıfrlyq rentgendermen jabdyqtaldy. Ókpeni jasandy jeldetý apparattary men ottegi kontsentrattary da ár aýdandaǵy emdeý mekemelerine taratylǵan. 12 jyljymaly medıtsınalyq keshen aýdandarǵa jetkizilýde. Naýqastardy der kezinde anyqtap, qyzmet kórsetý maqsatynda arnaıy ýchaskeler men mobıldi toptar qurylǵan. Túrkistan oblysy Polıtsııa departamenti óńirdiń Bas sanıtarlyq dárigeriniń oblysta qatań karantındik shekteý sharalaryn engizý qaýlysyna sáıkes kúsheıtilgen túrde jumystar atqarýda.

Aýyl sharýashylyǵy – jalpy óńirlik ónimniń 20% quraıtyn oblystyń basymdy salasy. Jergilikti kókónis, baqsha, jemis-jıdek, et, sút ónimderimen óńir turǵyndary artyǵymen qamtamasyz etiledi. Al qus eti jáne jumyrtqamen qamtamasyz etý kólemi ortasha 35% quraıdy. Halyqqa jergilikti ónimderdiń qoljetimdiligin arttyrý baǵytyndaǵy jumystar turaqty baqylaýda jáne áleýmettik mańyzy bar azyq-túlik taýarlarynyń baǵasyn negizsiz ósirmeý boıynsha tıisti sharalar atqarylýda.