Túrkistan oblysynda koronavırýsty anyqtaýdyń aralas túrin engizý usynyldy
NUR-SULTAN. QazAqparat - Koronavırýsqa uqsas aýrýlarǵa, atap aıtqanda, koronavırýstyq ınfektsııa belgileri bar pnevmonııaǵa erekshe nazar aýdarý qajet. Barlyq óńirlerde syrqattanýshylyqtyń belsendi ósýi baıqalatyndyqtan, Túrkistan oblysynda PTR testileýmen qatar KVI aýrýlaryn dıagnostıkalaýdyń aralas túrlerin engizý usynyldy, dep habarlaıdy oblystyq ákimdiktiń baspasóz qyzmeti.
Oblys ákimi Ómirzaq Shókeevtiń tóraǵalyǵymen ótken apparat otyrysynda Ahýaldyq-taldaý ortalyǵy tarapynan Covid-19 baılanysty epıdemıologııalyq jaǵdaıy, mobıldi toptar qyzmetiniń tıimdiligi jáne jyl basynan beri Túrkistan oblysyndaǵy jalpy krımınogendik jaǵdaıǵa taldaý jasaldy. Bul týraly oblys ákimi apparatynyń ahýaldyq-taldaý ortalyǵynyń basshysy baıandady.
Májiliste PTR testileýmen qatar koronavırýsty dıagnostıkalaýdyń aralas túrlerin engizý arqyly halyq arasynda qaýipti indettiń ósýiniń naqty kórinisin anyqtaýǵa bolatyndyǵy aıtyldy. Ol úshin aýrýdy anyqtaýdyń ártúrli joldaryn qoldaný usynyldy. Atap aıtqanda, medıtsınalyq mekemelerde kompıýterlik tomografııa ádisi men rentgen jáne qan saraptamalary sekildi dıagostıka túrleri qosymsha tekseriletin bolady.
Sondaı-aq, mobıldi toptardyń jumysynyń tıimdiligi men aýdandarda COVID-19 ınfektsııasy men koronavırýs belgileri bar pnevmonııanyń taralýy arasyndaǵy baılanys kórsetildi. Nátıjesinde usynymdar shyǵaryldy. Oblys ákimi jaýapty sala basshylaryna atalǵan taldaý qorytyndysyn negizge alyp, áreket etýdi tapsyrdy.
Sonymen qatar, óńirdegi SOVID-19 juqtyrýdy taratpaý jónindegi mobıldi toptardyń tıimdiligi, tekserilgen nysandar men aıyppul salynǵan sýbektiler sany qarastyryldy. Ahýaldyq-taldaý ortalyǵynyń saraptamasy negizinde jasalǵan oblystaǵy jalpy krımınogendik jaǵdaı qaraldy. Jyl basynan beri oblystyq polıtsııa departmentinen kelip túsken jedel aqparattyq monıtorıngke sáıkes 1915 oqıǵa tirkelgen. Bul málimetter Túrkistan oblysynyń 3 qalasy men 13 aýdany týraly aqparatty qamtıdy. Ótken jyldyń sáıkes kezeńimen salystyrǵanda bıyl oqıǵalar sany 28,4% - ǵa azaıǵanyn kórsetti. Otyrysta nazar aýdarýdy talap etetin jaıttardy joıý jáne azaıtý boıynsha birqatar usynystar engizildi.
