Túrkistan oblysynda koronavırýstan jazylǵandar dárigerlerge alǵys aıtty
KENTAÝ. QazAqparat – Túrkistan oblysy, Kentaý qalalyq ortalyq aýrýhanasynda qaýipti indetten aıyqqan naýqastar sany artýda. Pandemııa bastalǵaly aýrýhanaǵa koronavırýs ınfektsııasyn juqtyrǵan 495 adam jatqyzylsa, olardyń 80 paıyzy dertinen aıyqqan, dep habarlaıdy QazAqparat tilshisi.
Oblystyq qoǵamdyq densaýlyq basqarmasynyń málimetinshe, Kentaýdaǵy ınfektsııalyq ortalyqta búginde 68 naýqas em qabyldaýda. Qalada COVID-19 indetimen qatar pnevmonııaǵa shaldyqqan naýqastar da emdelip shyǵya jatyr.
Osyndaı dıagnozben 14 shilde kúni ortalyqqa túsken Roza Alıeva búginde ózin jaqsy sezinetinin aıtady. Eki jaqty ókpeniń qabynýy men pnevmonııa dıagnozy qoıylǵan naýqas dárigerlerge ystyq yqylasyn bildirýde. 53 jastaǵy áıel qazirgi ýaqytta dárigerlerdiń qatań baqylaýyna alynǵan. Dertinen tolyq aıyqqan sátte úıine shyǵarylatyn bolady.
«Men shyn nıetimmen aýrýhananyń barlyq medıtsına qyzmetkerlerine alǵys aıtqym keledi. Óıtkeni aýrýhanaǵa men óte aýyr halde tústim. Tynys ala almastan, baqılyq bolyp ketemin ba degen de oılar boldy. Biraq mundaǵy dárigerler men medbıkeler der kezinde em kórsetýiniń arqasynda betim beri qarap, jazylyp shyqtym. Qazir ózdigimnen turyp, tynys alyp jatyrmyn. Rızamyn bul jandarǵa»,- deıdi Roza Alıeva.
Al, Otyrar aýdandyq ortalyq aýrýhanasynda provızorly 60 oryn bar. Qazirgi ýaqytta onyń 36-sy bos. Kelgen naýqastardyń barlyǵy dárigerlerdiń jiti qadaǵalaýynda bolady. Tıisti emdik sharalar qoldanyp, barlyq dárilik zattarmen tolyq qamtamasyz etilýde. Naýqastardyń biri Qoǵaly aýylynyń turǵyny Amanqyz Erdanova shilde aıynyń 4 kúni aýyr hálde jedel-járdemmen osynda jetkizilgen. Oǵan dárigerler eki ókpeniń tómengi bóliktik pnevmonııasy dıagnozyn qoıǵan. Tynys alý shamasyzdyǵy ekinshi dárejeli naýqastyń qosymsha sozylmaly vırýsty gepatıti de bolǵan. Zeınetkerge qajetti emdeý protsessi jasaldy. Nátıjesinde 73 jastaǵy naýqas tolyǵymen dertinen saýyǵyp, úıine shyǵaryldy. Qazirgi tańda ájeı úıinde bolǵanymen, dárigerlerdiń baqylaýynan tys qalǵan emes. Osyndaı adal eńbekteri úshin zeınet jasyndaǵy qarııa aq halatty abzal jandarǵa shynaıy alǵysyn bildirdi.
«Infektsııalyq aýrýhanaǵa túsken kezde jaǵdaıym tym nashar bolatyn. Ondaǵy dárigerler meni jaqsy qabyldap alyp, 14 kún em qabyldap shyqtym. Biraq kúnnen keıin densaýlyǵym da, tynys alýym da jaqsara bastady. Osy aq halatty abzal jandardyń arqasynda aman qaldym dep aıtqym keledi. Dári-dármek te, em de berdi. Sonyń arqasynda jaǵjaıym jaqsy»,- deıdi zeınetker.
