Túrkistan oblysynda koronavırýsqa qarsy barlyq sharalar qolǵa alynýda
TÚRKІSTAN. QazAqparat - Túrkistan oblysynda koronavırýs dertine shaldyqqan azamattar joq. Bul týraly Óńirlik kommýnıkatsııalar qyzmetiniń alańynda Túrkistan oblysy ákiminiń orynbasary Joldymurat Amanbaev málim etti, dep habarlaıdy QazAqparat.
Brıfıngige oblys ákiminiń orynbasary Sáken Qalqamanov, Túrkistan oblysy Taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Nurbek Nyshanov qatysty.
Alǵash bolyp sóz alǵan J. Amanbaev óńirde kópshilik jınalatyn jerlerde saqtyq sharalaryn saqtaýǵa shaqyrdy. Jıyn, kezdesýlerdi azaıtyp, oblys turǵyndaryna alańdamaý kerektigin aıtty.
Sondaı-aq, oblys ákiminiń orynbasary S.Qalqamanov óńirde 13 naýryzdan bastap ótkiziletin barlyq merekelik, sporttyq, mádenı, tanymdyq is-sharalar toqtatylatynyn jetkizdi.
«Túrkistan oblysy boıynsha 907 mektep, 1 441 mektepke deıingi uıym jumys isteıdi. Orta bilim berý mekemeleriniń oqýshylary 16 naýryzdan 5 sáýirge deıin 3 aptaǵa demalysqa shyǵady. Demalys kezeńinde balanyń jaýapkershiligi ata-anada, sondyqtan týrıstik nysandarǵa, kınoteatrlarǵa barmaýǵa shaqyramyz. Áleýmettik jelilerde alyp-qashpa qaýeset sózder kóp taralýda. Bul rette barlyq azamattarǵa tek resmı aqparatqa senýdi ótinemin», – dedi Sáken Qalqamanov.
Sonymen qatar, Túrkistan oblysy Taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Nurbek Nyshanov Túrkistan oblysynda koronavırýs derti anyqtalmaǵandyǵyn aıtty.
«Búginge deıin oblys aýmaǵyna kelýshiler arasynda koronavırýsqa kúdikti naýqastar tirkelgen joq. Oblys boıynsha koronavırýs ınfektsııasy aýyrǵan naýqastardy jatqyzý úshin ınfektsııalyq statsıonarlarda 100 oryn daıyndalǵan. Koronavırýs ınfektsııasyna uqsas klınıkasy bar naýqastardy jatqyzý, dıagnozdaryn anyqtaý maqsatynda 240 orynǵa provızorlyq statsıonar qarastyrylǵan. Barlyǵy – 340 oryn. Odan bólek barlyq aýdandar men qalalardaǵy ınfektsııalyq aýrýlar bólimi daıyndaldy. Qarym qatynasta bolǵandardy oqshaýlaý úshin oblys aýmaǵyna 505 orynǵa observatsııalyq gospıtal josparlanǵan», – dedi Nurbek Nyshanov.
Atap óteıik, búgingi tańda oblystyq turaqtandyrý qorynda qajetti taýarlardy satyp alýǵa múmkindik bar. Qazir qorda 6546,6 tonna ónim bar. Oblys aýmaǵyndaǵy qoımalar men iri saýda nysandarynda 11 ataýly taýardan 18 567 tonna ónim bar. Azyq-túlik qory jetkilikti. Sol sebepti, bazarǵa baryp azyq-túlikti kóptep alyp, dúrbeleń týǵyzýǵa negiz joq.
