Túrkistan oblysynda koronavırýsqa baılanysty sıtýatsııalyq ortalyq jumysyn bastady
TÚRKІSTAN. QazAqparat - Túrkistan oblysynyń ákimdigi óńir aýmaǵynda ınfektsııanyń taralýyna jol bermeý boıynsha barlyq qajetti medıtsınalyq, profılaktıkalyq jáne uıymdastyrý sharalaryn qabyldady. Arnaıy sıtýatsııalyq ortalyq qurylyp, shtab óz jumysyn bastady. Bul týraly búgin Óńirlik kommýnıkatsııalar qyzmetinde ótken brıfıngte oblys ákiminiń orynbasary Sáken Qalqamanov málimdedi, dep habarlaıdy QazAqparat.
QR Prezıdentiniń Jarlyǵyn iske asyrý jónindegi is-sharalar jospary ázirlenip, tótenshe jaǵdaı kezinde oblys aýmaǵynda birneshe sharalar júzege asady.
«Sanıtarlyq qaýipsizdik sharalaryn kúsheıte otyryp, iri saýda oryndarynyń jumys kestesi saǵat 10:00 men keshki 18:00 aralyǵynda bolady. Nan-bólke jáne kondıterlik ónimder tek oraýly kúıde satylýy qajet. Kıim-keshek bazarlary saǵat 11.00-17:00 aralyǵynda jumys isteıdi. Dámhanalar men meıramhanalar jumys ýaqyty keshki 22:00-ge deıin shektelip, kelýshiler sany 50 adamnan aspaýy qajet. Sporttyq is-sharalar kórermensiz ótedi. Aýqymdy otbasylyq saltanatty is-sharalar men eske alý salttaryn ótkizýge tyıym salynady. Saýda ortalyqtary, kınoteatr, teatr, kórme, fıtnes-ortalyqtar men jattyǵý zaldary, túngi klýbtar jáne adam kóp jınalatyn basqa da oıyn-saýyq oryndarynyń qyzmeti toqtatylady», - dedi Sáken Amangeldiuly.
Sonymen qatar, oblysta mektepten tys qosymsha bilim berý nysandary, aýla klýbtary, úıirmeler, sektsııalar, kompıýterlik klýbtar jabylady. Karantındik rejımdi saqtamaǵan, medıtsınalyq uıymǵa baryp qaralýdan bas tartqan azamattardy baqylaý kúsheıtiledi. Qoǵamdyq oryndar men kólikterde sanıtarlyq is-sharalar turaqty júrgiziledi. Barlyq emdeý jáne medıtsınalyq-áleýmettik mekemeler, qarttar men múgedekterge arnalǵan ınternattar men balalar úılerine kelýge tyıym salyna otyryp, karantınge jabylady.
Sondaı-aq, brıfıngte oblys ákimniń orynbasary Ulan Tájibaev oblystyq ákimdiktiń resmı saıty janynan aqparattandyrý paraqshasy ashylǵanyn baıandady. Onda koronavırýstan saqtaný joldary boıynsha keńester, oblysta indetke baılanysty qolǵa alynǵan barlyq sharalar jáne resmı aqparattar salynatyn bolady. Sonymen qatar, saýda oryndarynyń jumys isteý kesteleri jarııalanady.
