Túrkistan oblysynda koronavırýs juqtyrǵan besinshi naýqas ta Jetisaı aýdanynyń turǵyny ekeni anyqtaldy

Bul týraly onlaın brıfıngte oblystyq Taýarlar men kórsetiletin qyzmetterdiń sapasy jáne qaýipsizdigin baqylaý departamentiniń basshysy Nurbek Nyshanov málimdedi, dep habarlaıdy QazAqparat tilshisi.

Óńirdiń bas sanıtar dárigeriniń aıtýynsha, koronavırýs juqtyrǵan naýqastardyń tórteýi bir otbasynyń adamdary ekeni anyqtalǵan.

«Jetisaı aýdanynda alǵashqy tirkelgen naýqastyń úıindegi úsh adamnan da synama alǵan bolatynbyz. Olardyń bárinen alynǵan synamalar oń nátıje berdi. Odan bólek besinshi naýqas ta osy Jetisaı aýdanynyń turǵyny bolyp tabylady. Almaty qalasynda is-saparda bolǵan. Ol da kelip, aýrýhanada emdelip jatqan. Klınıkalyq belgileri boıynsha synamalar alynǵan kezde oń nátıje bergen. Qazirgi tańda olarmen qarym-qatynasta bolǵan 41 adam esepke alynyp, emdeý mekemelerine oqshaýlandy. Zerthanalyq synamalar alynyp, tıisti jumystar atqarylýda»,- dedi Nurbek Nyshanov.

Atalǵan departamenttiń málimetinshe, qazir naýqastar men qarym-qatynasta bolǵan adamdar dárigerlerdiń baqylaýyna alynǵan. Jaǵdaılary qanaǵattanarlyq dárejede. 31 naýryz kúni dezınfektsııalyq qyzmet naýqastardyń turǵan úı-jaılaryn dezınfektsııalaý jáne sanıtarlyq óńdeý sharalaryn ótkizgen. 31 naýryzda koronavırýs ınfektsııasyn juqtyrǵan naýqas Jetisaı aýdandyq ortalyq aýrýhanasynda em alýda.

«Óńirde Covid -19 koronavırýstyq ınfektsııasynan qolaısyz elderden kelgen 495 adam monıtorıngtik baqylaýǵa alynǵan. Onyń ishinde 1 «a» sanatyndaǵy elderden kelgeni - 9 adam, 1 «b» sanatyndaǵy elderden kelgeni - 486 adam bar. Infektsııa oshaǵynda oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti, basqarma mamandarymen jáne oblystyq ınfektsıonıst dárigermen epıdemıologııalyq zerdeleý jumystary men indetke qarsy sharalar kesheni júrgizilýde. «Ulttyq saraptama ortalyǵy» Túrkistan oblysy boıynsha dezınfektsııalaý ortalyǵy kúshterimen dezınfektsııalyq jumystar júrgizilgen» delingen habarlamada.