Túrkistan oblysynda koronavırýs juqtyrǵan áıel bosandy
TÚRKІSTAN. QazAqparat – Túrkistan oblysynda COVID-19 indetine shaldyqqan 20 jastaǵy júkti áıel dárigerlerdiń kómegimen aman-esen bosandy, dep habarlaıdy QazAqparat óńir basshysynyń baspasóz qyzmetine silteme jasap.
Ol Saıram aýdandyq ınfektsııalyq aýrýhanasyna júktiliktiń 39 aptasynda JRVI sımptomdarymen ambýlatorlyq qabyldaýǵa jetkizilgen. Synama nátıjesi onyń koronavırýs ınfektsııasyn juqtyrǵanyn kórsetti. Aıy – kúni tolyp, tolǵaǵy qysqan áıel men onyń sábıiniń ómirin aman alyp qalý úshin shuǵyl túrde bilikti dárigerlerdiń qatysýymen arnaıy konsılıým ótkizilgen.
Áıel aman-esen tuńǵyshyn dúnıege ákeldi. Náresteniń salmaǵy 3 keli 400 gramm. Odan birden koronavırýsqa synama alyndy. Jańa týǵan ul bala anasynan oqshaýlandyryldy. Test qorytyndysy náresteniń boıynan COVID-19 ınfektsııasynyń tabylmaǵanyn kórsetti. Mamandardyń aıtýynsha, sábıdiń jaǵdaıy jaqsy. Jeke boksta, dárigerlerdiń jiti baqylaýynda. Anasynyń da jaǵdaıy birqalypty.
Aıta keteıik, byltyr óńirde koronovırýs ınfektsııasyn juqtyrǵan 122 júkti áıel aman-esen bosanǵan. Túrkistan oblysynda jyl basynan beri 15 myńǵa jýyq sábı dúnıege kelgen. 2020 jyly óńirde 61 274 náreste týylǵan.
Túrkistan oblysy bala týý kórsetkishi boıynsha elimizde kósh bastap tur.
