Túrkistan oblysynda koronavırýs juqtyrǵan 11 kúndik sábıdiń júregine ota jasaldy
TÚRKІSTAN. QazAqparat – Túrkistan oblysynda koronavırýs ınfektsııasyn juqtyrǵan 11 kúndik sábıdiń júregine ota jasaldy. Saıram aýdanyndaǵy aýrýhanaǵa aýyr halde jetkizilgen shaqalaqtyń dene qyzýy kóterilip, entigý belgileri bolǵan, dep habarlaıdy QazAqparat tilshisi.
Oblystyq qoǵamdyq densaýlyq saqtaý basqarmasynyń málimetinshe, medıtsınalyq jedel-járdem qyzmetimen jetkizilgen náreste birden jansaqtaý bólimine jatqyzylǵan. Júrgizilgen dıagnostıkalyq zertteýlerdiń nátıjeleri náresteden týa bitken júrek aqaýy belgileri bar ekenin kórsetken.
Júrek qalqasynyń tarylýynan balanyń ómirine qaýip tóngen. Oǵan qosa jańa týǵan sábıdiń pnevmonııa men koronavırýs ınfektsııasyna shaldyqqany anyqtalǵan.
Oblystyq balalar aýrýhanasynyń kardıohırýrgy Almat Baısalov jetekshilik etken bilikti dárigerler quramy asa mańyzdy sheshim qabyldap, sábıge shuǵyl túrde ota jasaǵan.
Eki saǵatqa sozylǵan operatsııa sátti ótip, kishkentaı naýqas aman qalǵan. Otadan keıin birden qan júrip, qan qysymy da rettelgen.
Dárigerlerdiń aıtýynsha, koronavırýs ınfektsııasynyń taralýyna jol bermes úshin operatsııa jansaqtaý bóliminde júrgizilgen. Sábı qazir de sol jerde em qabyldaýda. Oǵan jeke dáriger men jeke medbıke bekitilgen.
Al, bala ómirin arashalap qalǵan dárigerlerdiń qatarynda kardıohırýg-dárigerler Almat Baısalov pen Almaz Áshirov jáne anestezıolog Aqjol Ábdiraıymov, reanımatolog-dárigerler Ǵabıtjan Ismaılov pen Erlan Rahymov bar.
Sábıdiń ata-anasy aq halatty abzal jandarǵa alǵysyn aıtty.
