Túrkistan oblysynda koronavırýs taralýynyń aldyn alý maqsatynda aýqymdy sharalar iske asyrylýda
TÚRKІSTAN. QazAqparat – Túrkistan oblysynda koronavırýs indeti taralýynyń aldyn alý maqsatynda aýqymdy sharalar júrgizilýde. Turǵyndar arasynda túsindirý jumystary qolǵa alynyp, oblysqa kireberistegi beketterde jolaýshylardyń densaýlyǵy tekserýden ótkizilýde, dep habarlaıdy QazAqparat tilshisi.
Saryaǵash aýdanynda COVID-19 koronavırýs indetiniń taralýyn aldyn alý maqsatynda qurylǵan jumysshy top jergilikti bazarlardy aralap, monıtorıng jáne túsindirý sharalaryn júrgizdi. Monıtorıng barysynda azyq-túlik baǵalary tekserilip, bazar basshylyǵy men kásipkerlerge baǵany negizsiz kótermeý kerektigi túsindirildi. Aldaǵy ýaqytta óńirde sanıtarlyq-epıdemıologııalyq jaǵdaıdyń turaqtylyǵyn saqtaý jáne aldyn alý sharalaryn kúsheıtý boıynsha monıtorıng jumystary udaıy júrgizilip, aýdanda saqtyq sharalary qatań baqylaýda.
Al, Túlkibas aýdanynda Jambyl oblysynan kireberistegi «Shaqpaq» beketinde jáne toǵyz joldyń torabynda oryn tepken Túlkibas vokzalynda jolaýshylardy tekserý sharalary júrgizilýde. Qazirgi tańda kúre joldyń boıynda ashylǵan arnaıy beketterde 7 polıtsııa, 34 medıtsına qyzmetkerleri táýligine 24 saǵat arnaıy qurylǵymen azamattardyń dene qyzýlaryn ólshep, tekseristen ótkizýde. Sońǵy málimetke sáıkes, Shaqpaq beketinen 15358 jolaýshy ótse, Túlkibas TJ beketi arqyly 695 azamat tekseristen ótken. Jolaýshylar qatarynda koronavırýs dertin juqtyrǵandar anyqtalmaǵan. Bul baǵyttaǵy sharalar aldaǵy ýaqytty júıeli túrde jalǵasady jáne aýdan ákimdiginiń qatań baqylaýynda bolmaq.
