Túrkistan oblysynda kornavırýs vaktsınasy aldymen medıtsına qyzmetkerlerine salynady
TÚRKІSTAN. QazAqparat – Túrkistan oblysynda kornavırýsqa qarsy ekpe medıtsına qyzmetkerlerinen bastap salynady. Bul týraly búgin Óńirlik kommýnıkatsııalar qyzmetinde ótken brıfıngide oblystyq qoǵamdyq densaýlyq saqtaý basqarmasynyń basshysy Marat Pashımov málimdedi, dep habarlaıdy QazAqparat tilshisi.
Marat Pashımovtyń aıtýynsha, óńirde pandemııanyń yqtımal ekinshi tolqynynda aýrýdyń taralýyn boldyrmaý maqsatynda tıisti sharalar qolǵa alynýda. Osyǵan baılanysty aımaqta 1 aqpannan bastap koronavırýsqa qarsy ekpe jumystary júrgizilmek.
«Qazirgi tańda oblys boıynsha 610 ınfektsııalyq jáne 340 karantındik tósek-oryn uıymdastyrylǵan. Búginde ınfektsııalyq tósek-oryndar sanynyń júktemesi - 23,6%, karantındik tósek-orynnyń júktemesi - 13%-dy qurap otyr. Qajet bolǵan jaǵdaıda ınfektsııalyq tósek-oryndar sanyn 5 610-ǵa deıin ulǵaıtýǵa múmkindik bar. Sonymen qatar, 12 birlik jyljymaly medıtsınalyq keshen jıyntyǵy satyp alynyp, aýdandardy qamtamasyz etý kórsetkishi 100 paıyzdy qurady. Jedel-járdem qyzmetine 122 avtokólik satyp alý josparlanyp, 77 avtokólik jetkizildi. Bul avtokólikter jedel-járdem qyzmeti parkin 96%-ǵa jańartýǵa múmkindik beredi», – dedi M.Pashımov.
Óz kezeginde oblystyq bas memlekettik sanıtarııalyq dárigeri Nurbek Nyshanov 1- 19 qańtar aralyǵynda COVID-19 rastalǵan 231-jaǵdaı tirkelgenin atap ótti. 100 myń halyqqa shaqqandaǵy ıntensıvtik kórsetkish 11,4 quraǵanyn jetkizdi.
