Túrkistan oblysynda kópsalaly medıtsınalyq ortalyqtyń qazyǵy qaǵyldy
TÚRKІSTAN. QazAqparat – QR Premer-Mınıstri Asqar Mamın Túrkistan qalasyna sapary barysynda jańadan salynatyn kópsalaly aýrýhananyń irgetasyn qalady.
630 oryndyq aýrýhananyń qurylysy memlekettik jekemenshik áriptestik baǵdarlamasy sheńberinde júzege asyrylmaq, dep habarlaıdy QazAqparat tilshisi.
Emdeý ortalyǵynyń qurylysy eki jyldan asa ýaqyt merziminde júrgizilip, paıdalanýǵa beriledi dep josparlanǵan. Bul maqsatqa 100 mln AQSh dollary kóleminde ınvestıtsııa tartylmaq. Qurylys jumystaryn «Sembol construction» túrik kompanııasy qarjylandyrady.
Jalpy aýmaǵy 16 gektar jerdi alatyn kópsalaly aýrýhanada dıagnostıkalyq keńes kórsetýden bastap neırohırýrgııa, ýrologııa, jaraqat, qaterli isik aýrýlary syndy medıtsınalyq kómek kórsetetin bólimder jumys isteıdi. Ǵımarat tolyqtaı zamanaýı medıtsınalyq qural-jabdyqtarmen qamtamasyz etilmek.
Úkimet basshysy sondaı-aq jańadan salynyp jatqan mádenı nysandardyń da qurylysyn aralap kórdi. Jańa ákimshilik-iskerlik ortalyǵynan boı kóterip jatqan «Uly dala eli» ortalyǵy 2020 jyly ashylady dep josparlanǵan. Aǵymdaǵy jyldyń sáýir aıynan bastalǵan qurylys jumystaryn «BI Construction turkestan» kompanııasy júrgizýde.
Atyraý oblysy ákimdiginiń tapsyrysymen boı kóterip jatqan ortalyqtyń aýmaǵy 6200 sharshy metr. Al, oblystyq ǵylymı-ámbebap kitaphanansynyń qurylysyn Shymkent qalasynyń ákimdigi qarjylandyrýda. 1,0 gektar aýmaqta ornalasqan nysannyń qurylysy aǵymdaǵy jyldyń naýryz aıynda bastalyp, keler jyldyń osy aıynda paıdalanýǵa berilmek. Sonymen qatar shahardyń rýhanı-mádenı aımaǵynda «UÁQ Samuryq-Qazyna» AQ tapsyrysymen Qoja Ahmet ıAsaýı murajaıynyń qurylysy júrgizilýde. Al, týrıstik vızıt ortalyǵy - Otyrar qoryq-mýzeıiniń bazasynda salynýda. Aýmaǵy 2200 sharshy metr bolatyn sáýletti ǵımaratty salýǵa Jambyl oblysy tapsyrys berip otyr. Ortalyq tarıhı -mádenı mura nysandaryn qorǵaý men olardyń zamanaýı talaptarǵa saı saqtalýyn qamtamasyz etýge yqpal etpek.
Onda arheologııalyq qoryq, tarıhı-mádenı jáne týrıstik ortalyq qurýǵa, sonymen qatar, mýzeı-kórme júıesimen ózara baılanystaǵy ortalyqtandyrylǵan qor jasalady dep josparlanǵan. Al, ekspozıtsııa zaldary fýnktsıonaldyq baǵdarlamada ár ýaqytta bolatyn ózgerister men túzetýlerdi eskerip jobalanǵan. Budan ózge restavratsııalyq jumystar men kórme konstrýktsııalaryn jasaý jumystary úshin tsokol qabatynda sheberhanalar ornalaspaq. Barlyq nysandardy aralap kórgen Úkimet basshysy qurylys jumystaryn sapaly júrgizip, merziminde aıaqtaýdy tapsyrdy.
