Túrkistan oblysynda kópirler kúrdeli jóndeýden ótip jatyr

NUR-SULTAN. QazAqparat - Túrkistan oblysy aýmaǵyndaǵy oblystyq mańyzy bar avtomobıl joldarynyń boıynda 412 kópir ornalasqan. Qazirgi tańda kópirlerdiń tehnıkalyq jaǵdaıyna qaraı jóndeýdi qajet etetin kópirlerge smetalyq qujattamalar ázirlenip, jóndeý jumystary júrgizilýde, dep habarlaıdy oblystyq ákimdiktiń baspasóz qyzmeti.

Búgingi tańda, birinshi kezekte jóndeýdi qajet etetin 11 kópirge kúrdeli jóndeý jumystaryn júrgizý úshin jobalaý-smetalyq qujattama ázirlengen.

Aǵymdaǵy jyly oblystyq Jolaýshylar kóligi jáne avtomobıl joldary basqarmasynyń tapsyrysymen 5 kópirge kúrdeli jóndeý jumystary júrgizilip jatyr. Atap aıtqanda, Báıdibek aýdany, Aǵybet aýyly men Juldyz eldi mekenin qosatyn kópir; Saryaǵash aýdany, Aqjar eldi mekenindegi kópir; Shardara aýdany, Kóksý aýylyndaǵy kópir; Keles aýdany, Oshaqty aýylyndaǵy kópir; Kentaý qalasy, Teke aýylyndaǵy kópir.

Joǵaryda atalǵan 5 kópirdiń 2-eýinde (Saryaǵash aýdany, Aqjar eldi mekenindegi, Báıdibek aýdany, Aǵybet aýyly men Juldyz eldi mekenin qosatyn) jóndeý jumystary aıaqtalyp, paıdalanýǵa berilse, qalǵan 3 kópirdiń jóndeý jumystaryn aǵymdaǵy jyldyń qarasha aıynda aıaqtaý josparlanǵan.

Aldaǵy ýaqytta kópirlerdi jóndeý jumystary kezeń-kezeńimen júrgiziletin bolady.