Túrkistan oblysynda kópbalaly analar kıeli jerlerge zııarat etip qaıtty
TÚRKІSTAN. QazAqparat - Túrkistan oblysynda 100 kópbalaly ana «Halyqaralyq áıelder kúni» merekesi qarsańynda kıeli jerlerge zııarat etip qaıtty. Tólebı aýdany ákimdiginiń uıymdastyrýmen ótken saıahat barysynda názikjandylar qasıetti «Domalaq ana», «Arystanbab» jáne rýhanı astanamyz Túrkistan qalasyndaǵy Qoja Ahmet ıAsaýı kesenesin aralap kórdi, dep habarlaıdy QazAqparat tilshisi.
Analardy jolǵa shyǵaryp salý rásiminde aýdan ákimi Baýyrjan Omarbekov pen aýdandyq máslıhattyń hatshysy Nurlan Qoıbaǵarov olardy kele jatqan merekemen quttyqtap, sát sapar tiledi. Otbasynyń kúndelikti sharýasy men bala tárbıesin jáne qoǵamdyq jumystardy qosa atqaryp júrgen áıelder qaýymy osylaısha saıahat jasap qaıtty. Olar úshin kıeli Túrkistan shaharynda túski as uıymdastyrylyp, arnaıy merekelik kontsert qoıyldy. Sondaı-aq, «Oramal ton bolmaıdy, jol bolady» degen ustanymmen árqaısysyna aq jaýlyq tartý etildi.
Mereke qarsańynda Báıdibek aýdanynda da polıtseıler turmysy tómen jáne kóp balaly otbasylarǵa qaıyrymdylyq jasady. Tártip saqshylary on aýyldyq okrýginde turatyn 20 januıanyń úılerinde bolyp, azyq-túlik zattaryn taratty. Polıtsııa qyzmetkerleri bul qadamnyń basty sebebi, aýdanda turatyn turmysy tómen kópbalaly otbasylarǵa jáne olardyń balalaryna qýanysh syılaý bolǵanyn aıtady. Aldaǵy ýaqytta atalǵan polıtsııa bólimi tarapynan osyndaı qaıyrymdylyq is-sharalary jalǵasyn tappaq.
