Túrkistan oblysynda Kongo-Qyrym qandy bezgegin juqtyrǵan bir bala qaıtys boldy

TÚRKІSTAN. QazAqparat – Túrkistan oblysynda Kongo-Qyrym gemorragııalyq qyzbasyn juqtyrǵan bir bala qaıtys boldy. Bul týraly Túrkistan oblysy sanıtarııalyq-epıdemıologııalyq baqylaý departamenti basshysynyń orynbasary Bahtyoraz Elemesov málimdedi, dep habarlaıdy QazAqparat tilshisi.

Mamandardyń sózinshe, kene shaqqan balanyń qaıtys bolýyna medıtsınalyq kómekke kesh júginýi sebep bolǵan.

Sondyqtan dárigerler kene shaqqan jaǵdaıda birden dárigerge kóriný kerektigin eskertedi.

«Kenege qarsy búkil jumystar júrgizilip jatyr. Kene shaqqan adam tez arada dárigerge júginýi kerek. Keneni qolmen alyp, julyp, myjǵylap tastaýǵa bolmaıdy. Arnaıy qysqyshpen aqyryn tartyp alý kerek. Sebebi, qan shashyrap adamǵa aýrý juǵýy múmkin. Kene shaqqan adam 14 kúndik medıtsınalyq baqylaýǵa alynady», - dedi Bahtyoraz Elemesov.

Jalpy Túrkistan oblysynda jyl basynan beri 985 adamdy kene shaqqan. Onyń ishinde eń kóbi Saýran aýdanynda tirkelip otyr.

Aıta keteıik, budan aldyn Túrkistan oblysynyń 9 turǵynynan Kongo-Qyrym qandy bezgegi tabylǵanyn jazǵan bolatynbyz.