Túrkistan oblysynda kóne dáýirlerge jatatyn tańbaly tastar tabyldy
Sozaq aýdanynda qazba jumystaryn júrgizgen arheologtar bul aımaqtan sondaı-aq, kóne jerleý oryndary men óńdelmegen altyn synyqtaryn da keziktirgen. Tańbaly tas tarıhı qundy jádigerleri oblystyq tarıhı ólketaný murajaıynda ótken baspasóz májilisinde tanystyryldy.
Tańbaly tas Qyzylorda, Qaraǵandy jáne Túrkistan oblystarynyń shekarasy túıisken jerde ornalasqan. Qazir onda Elbasy tapsyrmasyna sáıkes zertteý jumystary júrip jatyr. «Bolashaqqa baǵdar: rýhanı jańǵyrý» tarıhı eskertkishterdi qaıta qalpyna keltirý baǵytynda bul nysanǵa aıryqsha nazar aýdarylýda.
«Ótken jyly bizde jumysshy toby qurylyp, 104 nysan iriktelip alyndy. Ony «Rýhanı jańǵyrý» keńsesine usyndyq. Tıisti ǵalymdar zerdelep, bizdiń oblystan 26 nysan respýblıkalyq tizimge engizilip otyr. Osy tizimniń ishinde Sozaqtaǵy tańbaly tas ta bar», - deıdi oblystyq Mádenıet jáne tilderdi damytý basqarmasy basshysynyń mindetin atqarýshy Asylhan Temirhan.
Jobanyń maqsaty - qasıetti Túrkistan men Ulytaý arasyn jalǵaǵan shejireli aımaq atyn nasıhattaý. Tarıhı eskertkishterdi saqtaý. Qazba jumystarynyń bel ortasynda júrgen arheolog, «Mádenı mura» ǵylymı zertteý ortalyǵynyń ǵylymı qyzmetkeri Saǵymbaı Murǵabaevtyń aıtýynsha, Tańbaly tas aýmaǵynda tarıhı 4 nysan anyqtalyp otyr. Aldaǵy ýaqytta osy aýmaqqa týrıstik baǵyttar belgilenbek.
«Negizgi nysandar retinde ol jerden eki keshen tabylyp otyr. Ol jerde de zertteý jumystary júrip jatyr. Jaqyn arada belgili bolady. Onyń ereksheligi sonda - ol qumdy jer bolyp keledi. Sondyqtan, ondaǵy jerleý oryndaryndaǵy buıymdar jaqsy saqtalǵan», - deıdi ol.
Atalmysh jumystar qoǵamdyq sanany jańǵyrtý baǵdarlamasynyń aıasynda júzege asyp jatyr. Al óńirde 1 281 tarıhı eskertkish bar. Olardyń joıylyp ketýine jol bermeý úshin is-sharalar jasalýda. Jaqynda tarıhı kıeli oryndarǵa arnalǵan ańyz-áńgimeler jınaǵy jaryq kórmek. Sondaı-aq, tarıhı eskertkishterdi kópshilikke nasıhattaıtyn arnaıy saıt ashylady.
