Túrkistan oblysynda kommýnaldyq qyzmet tólemine ótinim berýge arnalǵan bot iske qosyldy
NUR-SULTAN. QazAqparat - QR Prezıdentiniń tapsyrmasy aıasynda Túrkistan oblysynda kommýnaldyq qyzmetter úshin tólemder beriletin bolady, dep habarlaıdy oblystyq ákimdiktiń baspasóz qyzmeti.
Tólemderdi óteý kelesi sanattarǵa jatatyn azamattarda nemese onymen birge turatyn onyń otbasy múshelerinde kommýnaldyq qyzmetterdiń derbes shottary bolǵan jaǵdaıda, karantın engizilgen aýmaqtaǵy eldi mekenderde júzege asyrady. Tómendegi sanattarǵa jatatyn azamattar ótinish bergen kommýnaldyq qyzmetterdi jetkizýshimen shart osy otbasy músheleriniń biriniń atynda bolýy tıis.
Atap aıtqanda:
- 1, 2 jáne 3 toptaǵy múgedekter;
- Uly Otan soǵysynyń múgedekteri men qatysýshylary jáne Uly Otan soǵysynyń múgedekteri men qatysýshylaryna teńestirilgen adamdar;
- múgedek balalardy tárbıeleýshi otbasylar; kópbalaly otbasylar;
- eń tómen jáne az zeınetaqy alatyn zeınetkerler;
- memlekettik nemese qoǵamdyq mindetterin, áskerı qyzmetin oryndaý kezinde, ǵarysh keńistigine ushýdy daıyndaý nemese júzege asyrý kezinde, adam ómirin qutqarý kezinde, quqyq tártibin qorǵaý kezinde qaza tapqan (qaıtys bolǵan) adamdardyń otbasylary; ataýly áleýmettik kómek alatyn azamattar, onyń ishinde jalǵyz basty zeınetkerler jatady.
Kommýnaldyq qyzmetterdi tóleý boıynsha halyqtyń tólemderin óteý úshin tutynýshylar (nemese olardyń zańdy ókilderi) «Telegram» messendjerindegi «SmartTurkistanBot» boty arqyly nemese aýdandar men qalalardaǵy call-ortalyqtar arqyly jeke sáıkestendirý nómirin, áleýmettik mártebesin jáne kommýnaldyq qyzmet boıynsha derbes shotynyń derekterin usyna otyryp, ótinish bere alady.
Joǵarydaǵy atalǵan sanattarǵa jatatyn tutynýshylarǵa 15 myń teńgeden 2 aı (sáýir, mamyr) merzimi úshin tólem júrgiziletin bolady. Atalǵan kómekti alýǵa ótinim bildirý mamyr-maýsym aılary aralyǵynda qabyldanatyn bolady.
Aıta keteıik, Telegram messendjerinde bot tabý úshin izdeý jolynda @SmartTurkistanBot terip, «Bas mázir» batyrmasyn basý qajet. Bul qyzmet halyqtyń áleýmettik jaǵynan osal toptaryna ǵana usynylady.
