Túrkistan oblysynda kómir qory jetkilikti - ákimdik
NUR-SULTAN. QazAqparat - Túrkistan oblysynda kúz ben qys maýsymynda 1 mln. 181,8 myń tonna kómir qajettiligi bar. Qazirgi tańda tasymaldanǵany 514,4 myń tonna (43,5%). Jetkizý jumystary aldaǵy ýaqytta tolyq aıaqtalady, dep habarlaıdy oblystyq ákimdiktiń baspasóz qyzmeti.
Jalpy jylytý maýsymynda oblysta kómir tapshylyǵy bolmaıdy. Búgin bul týraly Túrkistan oblysy Óńirlik kommýnıkatsııalar qyzmetinde Energetıka jáne turǵyn úı-kommýnaldyq sharýashylyq basqarmasynyń bólim basshysy Igilik Turǵymbekov málimdedi.
Sonymen qatar, jalpy oblysta jylý berý merzimi – 1 qarashaǵa belgilenip otyr. Alaıda mamandar ýaqytynan buryn aýa raıy sýyp ketse, jylytý maýsymy erterek bastalatynyn jetkizdi.
«Óńirdegi 2748 bıýdjettik mekeme jylytý maýsymyna tolyq daıyndalyp, olarǵa qajetti 171,1 myń tonna kómir otyny jáne 5 mln. 143,7 myń. lıtr suıyq otyn (dız.toplıvo) tolyq tasymaldandy. Oblystaǵy ortalyqtandyrylǵan jylýmen qamtamasyz etetin mekemelerge kómirdiń qajettiligi 108,8 myń tonna bolsa, tasymaldanǵany 43,2 myń tonna. Oblystaǵy turǵyndardyń kómirge qajettiligi - 902 myń tonna, tasymaldanǵany 301,2 myń tonna (33,4%). Tasymaldaý jalǵasýda. Temirjol stantsııasy qoımalaryndaǵy (j.d. týpık) 1 tonna kómirdiń satylý baǵasy - «Shubarkól» kómiri 14-17 myń teńge arasynda. Turǵyndar kómirdi qazirden bastap stantsııa qoımalarynan arzan baǵada satyp alǵandary durys», - dedi Igilik Ǵabıtuly.
Budan ózge, oblystyń mazýt otyny boıynsha qajettilik kólemi - 9,6 myń tonna. Búgingi kúnge tasymaldaýshy mekememen kelisim-shart jasalǵan. Aǵymdaǵy jyldyń qazan aıynan bastap tasymaldanbaq.
Aıta keterligi, óńirdiń jylytý maýsymyna daıyndyǵyna apta saıyn jáne turǵyndardy kómir otynymen qamtamasyz etý boıynsha kún saıyn turaqty monıtorıng júrgizilýde.
