Túrkistan oblysynda kómir qansha turady
Bıýdjettik mekemelerdiń kómir otynyna qajettiligi 143 myń tonnaǵa jýyq jáne ol 100 paıyz tasymaldanǵan. Óńirde kómir tapshylyǵy joq. Jylytý maýsymynyń barysy týraly oblys ákimi Ómirzaq Shókeevtiń tóraǵalyǵymen ótken májilis otyrysynda qaraldy.
Oblystyq Energetıka jáne turǵyn úı-kommýnaldyq sharýashylyq basqarmasynyń basshysy R.Turǵambaevtyń baıandaýynsha, óńirde kómir tasymaldaıtyn 24 mekeme bar. Turǵyndar úshin temir jol tuıyǵy bar eldi mekenderde 1 tonna Shubarkól otynnyń baǵasy 14700 - 20000 teńge aralyǵynda, al temir jol tuıyǵy joq eldi mekenderde 20 000 - 26 000 teńge arasynda saýdalanyp jatyr.
Jaýapty mekeme basshylaryna qatty otyn baǵasynyń kóterilýine jol bermeý boıynsha hat joldandy.
Jıynda sondaı-aq, eldi mekenderdi gazdandyrý máselesi de sóz boldy. Qazir bul baǵytta atqarylyp jatqan jumys barysy qarqyndy. Óńirde qurylysy aıaqtalǵan 300-ge jýyq gazben qamtamasyz etý nysandaryn kommýnaldyq menshikten respýblıkalyq menshikke ótkizý boıynsha jumystar júrgizilýde. Olardyń birqatary jyl sońyna deıin paıdlanýǵa beriledi. Sońǵy málimet boıynsha Túrkistan qalasynda tolyq tabıǵı gazben qamtylý deńgeıi 85,9 paıyzdy qurady. Bul týraly Túrkistan qalasynyń ákimi Nurbol Turashbekov málimdedi. Ákimshilik-iskerlik ortalyqta ornalasqan jańa 7 qabatty 10 turǵyn úıde gaz berý jumystary tolyq aıaqtalǵan. 7 qabatty 14 turǵyn úıdiń jylý júıesi páterishilik gaz tutynatyn avtonomdy gaz qazandyqtarymen jobalanǵan.