Túrkistan oblysynda kolledjderge 15 myńnan astam grant bólindi
Túrkistan oblystyq bilim basqarmasy basshysynyń orynbasary Nurjan Nurlybaevtyń aıtýynsha, ár saladan jınaqtalǵan usynystarǵa sáıkes 87 mamandyq boıynsha qajettilik anyqtalǵan.
Jalpy óńirde 52 kolledj bar. Memlekettik tapsyrysty bilim standarttaryna ári tehnıkalyq talaptarǵa saı oqý oryndary ǵana ala alady. Bıyl óndiristi damytý maqsatynda ınjenerlik, óńdeý jáne qurylys salalary úshin 8375 grant, aýyl, orman, balyq sharýashylyqtary jáne veterınarııa salasyna – 700, qyzmet kórsetý kadrlaryn daıarlaýǵa 1575 grant bólý josparlanǵan. ıAǵnı, tehnıkalyq mamandyqtarǵa basymdyq berilip otyr. Al, bilim salasy mamandaryn daıarlaýǵa – 1100, óner jáne gýmanıtarlyq ǵylymdarǵa – 275, kásipkerlik basqarý jáne quqyq salasyna –375, tsıfrlandyrý, aqparattyq-kommýnıkatsııalyq tehnologııalar salasy úshin 1950 grant bólý mejelengen.
2023-2024 jyly oqý jylyna tehnıkalyq jáne kásiptik, orta bilimnen keıingi bilimi bar kadrlardy daıarlaýǵa arnalǵan memlekettik bilim berý tapsyrysyn qalyptastyrý jáne bólý jónindegi komıssııa otyrysynda jastardy orta bilimmen qamtý jaıy talqylandy. Jıynǵa tóraǵalyq etken Túrkistan oblysy ákiminiń orynbasary Beısenbaı Tájibaev kolledjge túsýshi túlekterdi memlekettik grantpen qamtý baǵytyndaǵy jumysty jandandyrýdy tapsyrdy.
«Ótken jyly Túrkistan oblysy úshin arnaýly oqý oryndaryna 17 myń grant bólingen. Biraq onyń birazy ıgerilmeı, keri qaıtarylǵan. Onyń túrli sebepteri bar. Biraq bıyl mundaı olqylyq qaıtalanbaýy tıis. Osyǵan sáıkes óńirimizge 15300 grant usynylyp otyr. Onyń 650-den astamy oblystyq bıýdjetten medıtsınalyq mamandardy daıarlaýǵa baǵyttaldy. Kolledjde grantqa túsken stýdentterge 30 myń teńge stıpendııa beriledi. Osy múmkindikti jastarymyz paıdalansyn», - dedi Beısenbaı Tájibaev.
Aıta keteıik, Túrkistan oblysy boıynsha bıylǵy oqý jylynda 30 myńǵa jýyq oqýshy mektepti bitirse, 42 myń oqýshy 9-synypty támamdaıdy.
