Túrkistan oblysynda kolledj ustazdary eski kólikten elektromobıl qurastyrdy
Báıdibek aýdanynda ornalasqan 19-ynshy kolledj ustazdary «Tiko» markaly kóliktiń qurylymyn ózgertip, elektromobıl jasap shyǵardy. Olar motoryn alyp tastap, ornyna elektr qýatynan kúsh alatyn qurylǵy ornatty. Qazir kólik júrip tur. Kiltti burap iske qosqanda dybyssyz otalady. Al janar maı quıyp, matordyń maıyn tekserý degen jumys múldem joq.
«Shymkentte elektrli mototsıkldermen qysh tasıtyndar bar eken. Solarmen baılanysyp, qurylymyn kórip aldyq. Sondan ózimiz qurastyrýǵa kiristik. Bul jumystardy kolledjdegi birneshe ustaz birigip jasadyq. Máselen, avtoelektrık symdaryn jalǵasa, avtomehanık jigitter motoryn aýystyrdy. Bar maqsatymyz «WORLDSKILLS TURKISTAN-2023» baıqaýynan júlde alý edi. Jasaǵan jumysymyz nátıje berdi. Baıqaýdan júldeli oryn aldyq», - deıdi ustaz Abzal Qulmahanov.
Elektromobıldi qýattaý qıyndyq týdyrmaıdy. 220 VT-tyq úıdegi tokpen-aq energııamen toltyryp alýǵa bolady. Akkýmýlıatolar kóliktiń sońǵy oryndyqtaryna ornalastyrylǵan. Árbir qýat kúshimen 4-5 saǵat boıy júrýge múmkindik bar.
«Kúzde bastalǵan qurastyrý jumystary kóktemde aıaqtaldy. Bul jumystarǵa Aıdar Beıimbetov, Abzal Qulmahanov, Qaırat Rahymbekov, Qanat Áýezhan jáne ózge de áriptesterimiz óz úlesterin qosty. Barshamyz birigip jasadyq», - deıdi aǵa sheber Baýyrjan Áýelbekov.
Kolledj ustazdary «AZLK» markaly «Moskvıchtiń» qurylymyn da ózgertip, jol talǵamaıtyn kólik etip shyǵarǵan. Bir kórgende áskerı «djıp» sekildi kórinedi. Ol da júrip tur.
Budan bólek, qoldan traktor qurastyryp, oǵan sý tartýǵa arnalǵan motordy qoıǵan. Qozǵaltqyshy GAZ-51 júk kóliginen alynǵan. Munyń da kýzovyn ustazdar qoldan jasaǵan.
«Qazir mektep muǵalimderi kolledj stýdentterine ózderi qurastyrǵan kóliktermen tájirıbelik sabaqtar ótkizedi. Odan bólek, jastardy zamanaýı kólik qurastyrý isine baýlyp jatyr», - deıdi kolledj dırektory Aıdarbek Ilıasov.
