Túrkistan oblysynda kólik urylary ustaldy
TÚRKІSTAN. QazAqparat – Túrkistan oblysy, Ordabasy aýdanynyń turǵyny ruqsat qaǵazy bolmaýyna baılanysty blokposttan óte almaı qalǵan. Kóligin úsh táýlikke gaz quıý beketine tastap ketken turǵyn ony sońynan tappaı qalǵan, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, kóligin joǵaltqan turǵyn polıtsııaǵa aryzdanǵan. Aıtýynsha, «Samara-Shymkent» tas jolynda ornalasqan gaz quıý beketiniń operatoryna ótinish etip, ózine tıesili markasy «Audi 100» avtokóligin tastap ketkenin kórsetken. Ózine 1,5 mln teńgeniń shyǵyn kelgenin jetkizgen. Jedel izdestirý sharalaryn júrgizgen tártip saqshylary kúdiktini Kentaý qalasyna qarasty aýyldardyń birinen ustady. Ol gaz quıý beketiniń qyzmetkeri bolyp shyqty.
«Tergeý barysynda kúdiktiniń kólikti mas kúıde aıdap ketip , Túrkistan qalasyna deıin kelgeni belgili bolǵan. Keıinnen óziniń izin jasyrý maqsatynda kólikti Túrkistan qalasyndaǵy kópqabatty páterlerdiń biriniń aýlasyna tastap, ózi Kentaýdaǵy týysynyń úıine barǵany anyqtaldy. Aıǵaqzat retinde tárkilenip alynǵan avtokólik zańdy ıesine qaıtarylyp, sotqa deıingi tergeý amaldary júrgizilýde», - delingen habarlamada.
Al, Saryaǵash aýdanynda jergilikti turǵyn shashtarazǵa kirgen kezde belgisiz bireýler kóligin urlap ketkenin jetkizgen. Qylmysty ashý maqsatynda polıtsııa bóliminiń qyzmetkerleri jedel-izdestirý jumystaryn júrgizip, blokposttarda turǵan polıtseılerge baǵyttama berilgen. Sonyń nátıjesinde kelesi kúni Saryaǵash APB JPQ ýchaskelik polıtsııa ınspektorlary polıtsııa maıory Ilıas Egizbaev pen polıtsııa kapıtany Serjan Quljanovtar izdeýdegi kólikti baıqap qalǵan. Tekserý barysynda ishinde ishimdikke toıyp alǵan eki turǵynnyń bary anyqtalǵan. Tergeý barysynda bir kóshede turatyn eki tanys mas halde kele jatyp, esigi ashyq turǵan kólikke minip ketkeni anyqtalǵan. Qazirgi tańda eki jaıt ta QR QK-niń 200-babymen tirkelip, sotqa deıingi tergeý amaldary júrgizilýde.
