Túrkistan oblysynda kólik nómiriniń ornyna esimin jazyp alǵan júrgizýshi jaýapqa tartyldy
TÚRKІSTAN. QazAqparat - Túrkistan oblysynda kólik nómiriniń ornyna esimin jazyp alǵan júrgizýshi jaýapqa tartyldy. Quqyqbuzýshylyqqa jol bergen turǵyn áleýmettik jelilerge monıtorıng júrgizý kezinde anyqtalǵan, dep habarlaıdy QazAqparat tilshisi.
Osyndaı kezekti tekserý kezinde Saıram aýdanynyń polıtseıleri qala kósheleriniń birinde artqy memlekettik nómiri turatyn orynǵa óziniń esimin qoıyp alǵan «Mersedes-Bents» markaly avtokóliktiń beınejazbasyn baıqap qalady. Kólik tizgindeýshi beınekóriniste jol boıynda basyp ozý maqsatynda qarsy baǵytqa shyqqan. Aýdandyq polıtsııa qyzmetkerleri avtokóliktiń ıesi Aqsýkent aýylynyń turǵyny ekenin anyqtady.
«Jas jigit jol júrisi erejelerin buzǵany úshin QR ÁQBtK-niń úsh birdeı babymen jaýapqa tartyldy. Olar, 590-baby 4-bóligimen «Kólik quraldaryn paıdalaný qaǵıdalaryn buzý», 593-baby 2-bóligimen «Jol júrisi qaǵıdalarynda kózdelgen jolaýshylardy jáne júkterdi tasymaldaý, qaýipsizdik beldikterin nemese motoshlemderdi paıdalaný jónindegi talaptardy saqtamaý», 596-baby 2-bóligimen «Kólik quralyn joldyń júrý bóliginde ornalastyrý, qarsy júrip ótý nemese basyp ozý qaǵıdalaryn buzý». Qazirgi tańda jol júrisi qaǵıdalaryn óreskel buzǵan júrgizýshige qatysty ákimshilik is aýdandyq sotqa joldandy»,- delingen habarlamada.
