Túrkistan oblysynda kólik aýdarylyp, 3 ózbekstandyq kóz jumdy
ORDABASY. QazAqparat –Túrkistan oblysynda bolǵan jol apatynan 3 ózbekstandyq kóz jumyp, taǵy bireýi aýyr halde aýrýhanaǵa jetkizildi, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, jolda ketip bara jatqan Neksııa avtokóliginiń júrgizýshisi uıyqtap ketken. Saldarynan Ózbekstannyń tórt azamaty mingen kólik jol jıegine aýdarylǵan. Eki áıel oqıǵa ornynda kóz jumsa, taǵy bir jolaýshy Ordabasy aýdandyq aýrýhanasynda qaıtys boldy. Al, kólik júrgizýshisi atalǵan aýrýhanada em qabyldaýda.
«Apatqa ushyraǵan kólik Ózbekstanǵa tıesili. Qazirgi tańda osy jol kólik oqıǵasyna qatysty Qylmystyq kodekstiń 345-baby «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» boıynsha tergeý amaldary júrgizilýde», - dedi polıtsııadan.
