Túrkistan oblysynda kólik apatynan 4 adam qaza tapty
TÚRKІSTAN. QazAqparat – Túrkistan oblysyndaǵy Jetisaı-Shardara avtojolynda eki jeńil kólik betpe-bet soǵysqan. Saldarynan jolaýshylar men júrgizýshi aýyr jaraqattanyp, 4 adam qaza tapty, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, qaıǵyly jaǵdaı búgin shamamen saǵat 14:30-da bolǵan.
«Jetisaı-Shardara avtojolynyń 8 shaqyrymynda, Ketebaı aýylynyń boıynda «Neksııa» jáne «Lada-Vesta» markaly eki jeńil avtokólik betpe-bet soqtyǵysqan. Jol-kólik oqıǵasy saldarynan «Neksııa» kóliginiń júrgizýshisi men eki jolaýshysy jáne «Lada-Vesta» kóliginiń 1 jolaýshysy qaza tapty. Qazirgi tańda jol-kólik oqıǵasy bolǵan jerde Jetisaı aýdandyq polıtsııa bóliminiń jedel-tergeý toby jumys isteýde. QR QK 345-baby «Jol qozǵalysy nemese kólik quraldaryn paıdalaný erejelerin buzý» boıynsha sotqa deıingi tergeý amaldary bastaldy. Polıtsııa qyzmetkerleri oqıǵanyń tolyq mán-jaıyn anyqtaý ústinde» delingen habarlamada.
