Túrkistan oblysynda qoldan jasalǵan gaz qazandyqtarynan jaraqat alýshylar kóbeıdi
Túrkistan oblysynda qoldan jasalǵan gaz qazandyqtarynyń jarylý saldarynan jaraqat alýshylardyń qatary artqan. Máselen, 12 qańtar kúni Saryaǵash qalasynda gaz qazandyǵy jarylyp, 1962 jyly týǵan er azamat aýyr dene jaraqatymen aýrýhanaǵa jetkizilgen. Tótenshe jaǵdaılar boıynsha brıgada oqıǵaǵa qoldan jasalǵan qazandyqtyń sebep bolǵanyn anyqtady. Mamandardyń sózinshe, úı ıesi gazdy únemdeý maqsatynda 1 kún boıy qospaǵan. Al, qosqan kezde jylý júıesindegi qatyp qalǵan sýdyń áserinen jarylys bolǵan.
Qańtardyń 14 kúni Jetisaı aýdanynda da gaz qazandyǵy jarylǵan. Úı ıeleri otbasylarymen bir aptadaı úıde bolmaǵan. Al, oralǵan soń gaz qazandyǵynyń astyn jaǵyp, dúkenge shyǵyp ketken. Qoldan jasalǵan gaz qazandyǵy býdyń qysymyn kótere almaı, jarylyp ketken.
Sol kúni Saryaǵash aýdany, Qaplanbek aýyldyq okrýgine qarasty Jonaryq aýylynda jylý qazandyǵy jarylyp, 1980 jyly týǵan er azamat orta dárejedegi jaraqatpen, aýrýhanaǵa jetkizildi. Oqıǵa ornyna jedel jetken gaz mamandary oqys jaǵdaı adamı faktordyń áserinen bolǵandyǵyn anyqtaǵan. Jaraqat alǵan úı ıesiniń jubaıy gaz qazandyǵyn sóndirip, qasyndaǵy qatty otynmen jylytylatyn peshti jaqqan. Muzdap qalǵan qazandyq bý qysymyn kótere almaı, jarylyp ketken. Al, kelesi kúni atalǵan aýyldyq okrýgtiń ortalyǵynda osyǵan uqsas oqıǵa qaıtalandy. Jylý qazandyǵy jarylyp, 1972 jyly týǵan er azamat orta dárejedegi jaraqatpen aýrýhanaǵa jetkizildi. Oqys oqıǵaǵa jeke turǵyn úı ıesiniń monshada ornalasqan gaz júıesine qosylǵan qoldan jasalǵan qazandyqty iske qosýy sebep bolǵan. Muz bop qatqan qazandyq bý qysymyn kótere almaı, jarylyp ketken.
«Joǵaryda atalǵan oqys oqıǵalardyń basty sebebi - qoldan jasalǵan gaz qazandyqtarynan týyndap otyr. Sondyqtan ár abonent úı ishindegi gaz jabydyǵynyń tehnıkalyq talaptarǵa saı bolýyn muqııat qadaǵalaǵany jón. Sebebi, gazdy turmysta qoldaný erejelerin saqtaý - óz densaýlyǵyńyz ben jaqyndaryńyzdyń qaýipsizdiginiń kepili. Qoldan jasalǵan gaz qazandyǵy ómirińizge qaýip tóndiredi» - deıdi QazTransgaz aımaq AQ Túrkistan óndiristik fılıalynyń baspasóz hatshysy Nazym Qaıratqyzy.
