Túrkistan oblysynda qoqys polıgondarynyń ıelerine 4 mln teńge aıyppul salyndy
TÚRKІSTAN. QazAqparat - Túrkistan oblysynda sanıtarııalyq talaptarǵa sáıkes kelmegen qoqys polıgondarynyń ıelerine aıyppul salyndy. Kemshilikterge jol bergen 11 zańdy, 1 laýazymdy tulǵa jalpy somasy 4 226 940 teńge aıyppul tóleıdi, dep habarlaıdy QazAqparat tilshisi.
Túrkistan oblysynda qatty turmystyq qaldyqtardy tastaýǵa arnalǵan 127 polıgon bar. Olardyń 70-i memlekettiń menshiginde bolsa, qalǵan 57 polıgon jekemenshiktiń balansyna berilgen.
Túrkistan oblysynyń sanıtarııalyq-epıdemıologııalyq baqylaý basqarmasy quzyretti organdarmen birge memleket menshigindegi polıgondar jumysyna monıtorıng júrgizip, birshama kemshilikterdi anyqtady.
«Jalpy qatty turmystyq qaldyqtar polıgondarynyń sanıtarııalyq-qorǵanysh aımaǵy 1000 metr bolýy tıis. Al, Arys qalasy men Saryaǵash aýdanynda polıgonnyń sanıtarııalyq-qorǵanysh aımaǵynda turǵyn úılerdiń ornalasýyna jol bergen», - deıdi Túrkistan oblysynyń SEBD baspasóz hatshysy Ardaq Berden.
Sondaı-aq, tekserý nátıjesinde polıgondardyń basym bóliginde qoqys tasymaly kólikteriniń dóńgelekterin zararsyzdandyrýshy dezınfektsııalaý beton vannasynyń bolmaýy, polıgon aınalasynyń qorshalmaýy, dezınfektsııalyq sharalardyń júrgizilmeýi syndy QR DSM bekitken sanıtarııalyq talaptarǵa sáıkes kelmeıtindigi anyqtalǵan.
