Túrkistan oblysynda kóktemgi sý tasqynynyń aldyn alýǵa daıyndyq qandaı
TÚRKІSTAN. QazAqparat - Sý tasqynynyń aldyn alý maqsatynda Túrkistan oblysynda 1200 shaqyrymnan astam 680 aryq, kanal qoqystan tazartylǵan. 61500 dana qap, 482 tonna ınertti materıal ázirlengen, dep habarlaıdy QazAqparat tilshisi.
Tótenshe jaǵdaılar departamenti bastyǵynyń orynbasary E.Sarybaevtyń aıtýynsha, qazirgi tańda oblys aýmaǵynda sý tasqyny boıynsha jaǵdaı bir qalypty, turaqty baqylaýda.
«Tasqyn sýdy qaýipsiz ótkizý maqsatynda 21 aqpan men 20 naýryz aralyǵynda arnaıy jospar bekitilip, tıisti jumystar atqarylyp jatyr. Sý qoımalary men ózenderdiń sý rejımine kúndelikti monıtorıng júrgiziledi. Jalpy oblys boıynsha sý qoımalarynyń ortasha tolymdylyǵy - 45-50%. Tasqyn sýdy qabyldaýǵa jetkilikti oryn bar. Degenmen bosańsýǵa jol joq. Tabıǵat kez kelgen ýaqytta tosyn minez tanytýy múmkin» - dedi E.Sarybaev.
Jergilikti atqarýshy organdar men tótenshe jaǵdaılar departamenti tarapynan jalpy 2065 adam, 400 birlik tehnıka, 6 qaıyq, 294 motopompa daıyndalǵan.
«Qazgıdromettiń» naýryz aıyna jasaǵan boljamynda oblys aýmaǵynda jaýyn-shashyn túsýiniń aılyq mólsheri – jazyq aımaqtarda 17-69 mıllımetr, taýly aımaqtarda – 70-103 mıllımetr shamasynda.
Jeldiń soǵýy sekýndyna 15-20 metrdi quraıdy. Aýa temperatýrasy +5 pen +16 gradýs aralyǵynda bolady.
