Túrkistan oblysynda kóktemgi egis naýqany qarqyndy júrip jatyr
TÚRKІSTAN. QazAqparat – Túrkistan oblysynda kóktemgi egis naýqany qarqyndy júrgizilýde. Keles aýdanynda bıyl 24 myń gektarǵa aýyl sharýashylyǵy daqyldary egildi, dep habarlaıdy QazAqparat tilshisi.
Ózbekstanmen shekaralas aýdanda 1300-ge jýyq tehnıka kóktemgi dala jumystaryna qatysýda. Aǵymdaǵy jyly sharýalarǵa 1040 tonna janarmaı qajettiligi anyqtalyp, suranys tolyǵymen qanaǵattandyrylǵan. Onyń 233 tonnasy aqpan, 156 tonnasy naýryz jáne 291 tonnasy sáýir aılaryna bólingen. Qalǵan 360 tonnasy qosymsha ótinim bolǵan jaǵdaıda bosatylady dep josparlanǵan. Sondaı-aq, aýdanda oblys ákimi Ómirzaq Shókeevtiń tapsyrmasymen bir jerden 2-3 ret ónim alý jobasy qolǵa alynyp otyr. Osyǵan baılanysty búginde 8 aýyldyq okrýgtegi 130 sharýa qojalyǵy 706,7 gektar egistik jerdi daıyndady. Munda ozyq tehnologııany qoldana otyryp, jyl sońyna deıin taǵy qosymsha 70 jobany iske asyrý kózdelgen.
Odan bólek, aýdandaǵy aǵyn sý tapshylyǵyn boldyrmaý jáne aýyl sharýashylyǵy óniminiń kólemin arttyrý maqsatynda «Aranshy-1» sý arnasyn kúrdeli jóndeýden ótkizý josparlanǵan. Jyl sońyna deıin kanaldyń 2,2 shaqyrymy kúrdeli jóndeýden ótkizilmek. Jalpy, aýdanda uzyndyǵy 172,9 shaqyrym bolatyn 22 sý arnasy men 7 qashyrtqy qalpyna keltirilmek.
